15 gün qaldı: “Azəristilik”dən qışa hazırlıq - Açıqlaması

Mövsüm ərzində quruma məxsus 550 qazanxana istismar edilməklə 3800 yaşayış binası, 180,0 mindən artıq mənzil, 290 məktəb, 150 uşaq bağçası, 160 səhiyyə müəssisəsi və 1300-ə yaxın sosial və təsərrüfat obyektlərinin istiliklə təmin edilməsi nəzərdə tutulub.

Bu sözləri Axar.az-a Azəristiliktəchizat ASC-nin Abonent və Müştəri Xidmətlərinin rəisi Rafiq Əliyev 2018-2019-cu illər payız-qış mövsümünə hazırlıq tədbirləri haqqında danışarkən bildirib.

R.Əliyevin sözlərinə görə, qazanxana, istilik şəbəkələri, magistral və məhəllədaxili istilik kəmərləri, nəzarət ölçü cihazları və avtomatika, qaz, elektrik, nəqliyyat təsərrüfatları və digər istehsal təyinatlı avadanlıqların mövsümə hazırlanması ilə bağlı işlərə start verilib:

“Bilirsiniz ki, istilik mövsümü respublikanın dağ və dağətəyi rayonlarında 1 noyabr tarixindən, digər ərazilərdə, o cümlədən Bakı şəhərində 15 noyabr tarixindən başlayır.

Bununla əlaqədar istilik mövsümündə işləməsi nəzərdə tutulan bütün qazanxana və istilik məntəqələrində nasoslar, elektrik mühərrikləri təmir olunub, qazanlar və istilik mübadilə aparatları mexaniki və kimyəvi üsulla təmizlənib, nəzarət ölçü cihazlarının və elektrik avadanlıqlarının dəyişdirilməsi və sazlanması həyata keçirilib, magistral və məhəllədaxili istilik xətləri təzyiqlə yoxlanılaraq sınaqdan keçirilib.

Qış mövsümündə problem yarada biləcək istilik xətləri dəyişdirilərək yenisi ilə əvəz olunub və qazanxanalar ehtiyat qazan və nasoslarla təmin edilib”.

R.Əliyev bildirib ki, 550 qazanxana və 90 istilik məntəqəsi kompleks yoxlanılıb, 564 odluq təmir olunub:

“Həmçinin, 700 ədəd qazan aqreqatı əsaslı və cari təmir olunub, qazanların 27.425 m ekran boruları və konvektiv hissələri dəyişdirilib, 1100 ədəd qazan mexaniki və kimyəvi üsulllara təmizlənib, qazanlarda 1210 m2 izolyasiya örtüyü təmir olunub.

İstilik şəbəkəlirində 20.710 ədəd siyirtmə və ventil təftiş olunub. Onlardan 9750 ədədi əsası və cari təmir olunub, 705 ədədi isə yenisi ilə əvəz olunub.

Magistral və məhəllədaxili İstilik xətlərində 14.870 m2 istilik örtük qatı, qazanxana və istilik məntəqələrində 12500 m2 dam örtüyü təmir edilib. Bundan başqa, 595 ədəd kimyəvi su yumşaltma qurğuları işə hazırlanaraq tənzimlənmiş və Na-kationit süzgəclərində 31 ton kationit materialları dəyişdirilib”.

R.Əliyev bildirib ki, 974 km istilik xətləri yuyulub və hidravlik təzyiqə yoxlanılıb:

“30.5 km məhəllədaxili və magistral istilik xətləri əsaslı təmir olunub, 675 km istilik kəməri təmirdən sonra hidravlik təziyiqə yoxlanılıb.

Bundan başqa, 1880 ədəd qoruyucu klapan və 2280 ədəd əks klapan, 465 ədəd ehtiyyat su çəni təftiş və təmir olunub, 3080 ədəd çirktutan təmizlənib və 1154 ədəd qaz təsərrüfatı təftiş olunaraq 104 km qaz xətti yoxlanılıb. Ancaq hazırda da payız –qış mövsümünə hazırliqla əlaqədar tədbirlər davam etdirilir”.

ASC sözçüsü bildirib ki, istiliyin verilməsində hər hansısa problem yaranmaması üçün istehlakçılar da üzərlərinə düşən işi görməldir:

“İstehlakçılar tərəfindən yaşayıyış binaları, mənzillər və sosial obyektlərdə enerji qoruyucu tədbirlər görülməli, binaların ümumi istifadədə olunan hissələrində, pilləkən qəfəslərində və digər yerlərdə qapı və pəncərələrdən istilik itkilərin qarşısının alınması üçün müəyyən işlər görülməlidir.

Binadaxili və mənzildaxili istilik sistemləri təkrar yoxlanılmalı, istilik sistemlərində yaranmış su sızmaları və axıntılar dərhal aradan qaldırılmalı, əvvəlki mövsümdə istilikvermə qabliyyəti zəif olan qızdırıcı cihazlar yuyularaq təmizlənməli və ya yenisi ilə əvəz olunmalı, köhnə polad borulardan olan dik dayaqlarda tutulma halları müşahidə olunduğu zaman həmin dik dayaqlar yenisi ilə əvəz olunmalıdır”.