"34 saat dərs deyən müəllimimizin maaşı 1500–2000 manat arasında dəyişir" - Emin Əmrullayev

“2011-ci ildən başlayaraq müəllim əməkhaqqısı hər il orta hesabla 10 faiz artmaqda davam edib və bu il bir qədər də yüksək bir göstərici, yəni sentyabr ayında — 2026-cı ilin sentyabr ayına olan proqnozları nəzərə alsaq. 2011-ci ildən 2026-cı ilə qədər baxsaq, bu 15 illik dövr ərzində sistem əsaslı şəkildə, düşünürəm ki, bir yerdən başqa bir yerə gəlmişdir”.

Ens.az xəbər verir ki, bu fikirləri ADA Universitetində keçirilən “Sertifikatlaşdırma: səriştəli müəllim - keyfiyyətli təhsil" mövzusunda tədbirdə çıxışı zamanı elm və təhsil naziri Emin Əmrullayev dedi.

“Təbii ki, bizim də istəyimiz ondan ibarətdir ki, müəllim əməkhaqqısı ən yüksək məbləğlərdə qorunsun, amma bunun üçün həm obyektiv, həm subyektiv məqamları düşünmək lazımdır. Əsasən problem nədən ibarətdir? Yəni bu ümumi bir mənzərədir və nəticələrimizdən biri odur ki, müəllim əməkhaqqısı artır. Məqsədlərimizdən üçüncüsü ondan ibarətdir ki, müəllim əməkhaqqısı diferensiallaşmış şəkildə artır.

Yüksək nəticə göstərmiş müəllimimizin maaşı nisbətən aşağı nəticə göstərən müəllimimizin maaşından daha yuxarıdır. Nəticəsi aşağı olan və yaxud hələ ki sertifikatlaşdırmada iştirak etməmiş müəllimimizin maaşı əsaslı şəkildə ondan fərqlənir. Diferensiallaşmış əməkhaqqı bu deməkdir. Çünki əvvəlki dövrdə fərq yox idi, hamı eyni miqdarda alırdı, praktik olaraq. Bu prosesin başlanğıcıdır. İnancım ondan ibarətdir ki, növbəti illərdə bu proses bir az da genişlənəcək”.

Nazir vurğuladı ki, bizim məktəb sistemimizdə, idarəetmə sistemimizdə, təhsil sisteminin idarə olunmasında böyük problem müəllim maaşının saat hesabı verilməsidir:

“Yəni müəllim maaşını əgər saat hesabı verəcəyiksə, onu əsaslı şəkildə artırmaq çətin olacaq. Niyə görə? Çünki bu, riyazi olaraq çətindir. Məsələn, bizim elə 1 faizə yaxın, 31–34 saat dərs deyən müəllimlərimiz var. 34 saat dərs deyən müəllimimizin maaşı 1500–2000 manat arasında dəyişir. Bizim belə müəllimlərimizin sayı 4228 nəfərdir. Göründüyü kimi, 1 nəfər, 2 nəfər, 5 nəfər deyil, kütləvi xarakter daşıyır. Amma problem ondan ibarətdir ki, bütün müəllimlər 31 saat dərs deyə bilərmi? Yox. Bizim təhsil sistemimizdə o qədər saat yoxdur.

Deməli, hamı 31 saat və yaxud 30 saat dərs deyə bilmirsə, nəzəri olaraq hamıya 1500–2000 manat verə bilməyəcəyik. Çünki bu 1500–2000 manatın arxasında duran əsas şərt 31 saat dərs deməkdir. Bu saat hesabı məsələsi bundan ibarətdir. Yəni faktiki olaraq 1500 manat alan qrup isə həftədə təxminən 25 saat dərs deyir”.