ABŞ Bakıya Qarabağda yardım edəcək, Rusiyanı... – Trofimçuk

ABŞ heç vaxt Ermənistan və Azərbaycanı müharibəyə səsləməyib.

Axar.az xəbər verir ki, bunu “1in.am” saytına açıqlamasında rusiyalı politoloq Qriqori Trofimçuk deyib. Onun sözlərinə görə, ABŞ-a Cənubi Qafqazda öz maraqları vacibdir və Vaşinqton bölgəni gələcək hadisələrə, o cümlədən antiiran proqramının sürətləndirilmiş inkişafına hazırlayır. O, bu proqramda Qarabağdakı plasdarma xüsusi yer ayrıldığını bildirib:

“Kimisə torpaqların qaytarılması ilə qorxutmaq ABŞ üçün heç də pis variant deyil. Başqa sözlə, ABŞ Qarabağa nəzarət edib, Rusiyanın regiondakı mövqelərini zəiflətməyə cəhd edir. Boltonun ABŞ silahının Ermənistana satış imkanlarıyla bağlı bəyanatı məhz bununla əlaqədardır. Buraya həmçinin Cənubi Qafqaza ümumi nəzarətin gücləndirilməsi məsələsi də daxildir. ABŞ Ermənistandakı daxili siyasi hadisələrə böyük ümid bəsləyir, düşünür ki, bu, Moskvanın İrəvanda mövqelərini zəiflədir, Amerika proqramları üçün yol açır. Məhz buna görə Bolton açıq mətnlə Dağlıq Qarabağ konfliktinin həllinin ABŞ üçün strateji əhəmiyyət daşıdığını dedi. Vaşinqtonda anlayırlar ki, Ermənistan heç bir halda torpaqların Azərbaycana qaytarılması, Rusiya və ya ABŞ-ın nəzarətində olmasını qəbul etməyəcək. ABŞ hazırda torpaqların qaytarılmasında Azərbaycana kömək etməklə bərabər, həm də regionda konflikt tərəflərinə özünün şərtlərini diktə edəcək şərait yaratmaq istəyir. ABŞ Rusiyanın zəifləməsini, Moskvanın Qarabağa daha az diqqət ayırmasını gözləyərək, burada özünün mövqelərini heç bir əziyyət çəkmədən gücləndirmək istəyir”.