ABŞ-də aparılan araşdırma göstərib ki, qadınların təxminən üçdə biri, kişilərin isə dörddə biri qəsdən açıq havada günəş vannası qəbul edərək qaralmağa üstünlük verir.
Bu barədə JAMA Dermatology jurnalında dərc olunmuş araşdırmada bildirilib.
Araşdırma ABŞ-nin Atlanta şəhərində yerləşən Xəstəliklərə Nəzarət və Profilaktika Mərkəzinin (CDC) əməkdaşı Don M. Holman və həmkarları tərəfindən aparılıb. Tədqiqatın məqsədi ABŞ-də böyüklər arasında qəsdən açıq havada günəşlənmənin yayılma səviyyəsini qiymətləndirmək olub.
Təhlil 2024-cü il Milli Sağlamlıq Müsahibəsi Sorğusunda iştirak edən 31 615 yetkin şəxsin məlumatları əsasında aparılıb.
Nəticələrə görə, qəsdən açıq havada günəşlənmənin tənzimlənməmiş yayılma göstəricisi qadınlar arasında 30,2 faiz, kişilər arasında isə 26,6 faiz təşkil edib.
Müəlliflər müəyyən ediblər ki, bu davranışın yayılması yaş, irq və etnik mənsubiyyət, günəş şüalarına həssaslıq, fiziki aktivlik səviyyəsi və alkoqol istehlakı ilə əlaqəlidir.
Qadınlar arasında ən yüksək göstərici 18–29 yaş qrupunda (48,1 faiz), ispan mənşəli olmayan ağdərililər arasında (41,3 faiz), günəş şüalarına həssas olmayan şəxslərdə (38,3 faiz), həm aerob, həm də güc məşqləri üzrə tövsiyə olunan fiziki aktivlik normalarına əməl edənlərdə (39,5 faiz), eləcə də həddindən artıq və ya qısa müddətdə çox miqdarda alkoqol qəbul edənlərdə (47,2 faiz) qeydə alınıb.
Kişilər arasında isə ən yüksək göstərici 18–29 yaşlılarda (29,9 faiz), ispan mənşəli olmayan ağdərililərdə (30,5 faiz), günəş şüalarına həssas şəxslərdə (28,7 faiz), həm aerob, həm də güc məşqləri üzrə tövsiyə olunan fiziki aktivlik normalarını yerinə yetirənlərdə (32,2 faiz), həmçinin həddindən artıq və ya qısa müddətdə çox miqdarda alkoqol qəbul edənlərdə (31,2 faiz) müşahidə olunub.
Araşdırma həmçinin göstərib ki, qadınlar arasında qəsdən açıq havada günəşlənmə halları natamam ali və ya kollec təhsili olanlarda (37,5 faiz), eləcə də sağlam bədən çəkisinə malik şəxslərdə (38,7 faiz) daha yüksəkdir. Kişilər arasında isə bu göstərici evli və ya partnyoru olan şəxslərdə 25,8 faiz təşkil edib.
Tədqiqat müəllifləri bildiriblər ki, əldə olunan nəticələr dəri xərçənginin profilaktikası tədbirləri çərçivəsində qəsdən açıq havada günəşlənmənin qarşısının alınmasına daha çox diqqət yetirilməsinin vacibliyini göstərir.
Onların fikrincə, demoqrafik və davranış xüsusiyyətləri üzrə müəyyən olunan fərqlər gələcək elmi araşdırmaların aparılması və profilaktik müdaxilə proqramlarının hazırlanması üçün yeni istiqamətlər müəyyənləşdirir.
mənbə: medicalxpress.com
