ABŞ İsrailin sui-qəsd planları barədə İranı xəbərdar edib?

Bu ilin yazında Amerika Birləşmiş Ştatları oxşar əməliyyatların qarşısını almaq məqsədilə İsrail tərəfindən İranın bəzi rəhbərlərinin mümkün likvidasiyası (məhvetmə - red.) barədə məlumatları birbaşa Tehrana ötürüb.

Ens.az Oxu.az-a istinadən xəbər verir ki, bu barədə Ağ Evdəki mənbələrə istinadən "The Washington Post" (WP) qəzeti məlumat yayıb.

Nəşr qeyd edir ki, ABŞ və İsrailin zərbələri nəticəsində İranın ali lideri Əli Xamenei və digər dövlət rəhbərlərinin ölümündən sonra da Tehranın siyasətinin dəyişməməsi fonunda Vaşinqton münaqişənin diplomatik həlli yollarını araşdırmağa başlayıb. Birləşmiş Ştatlar İranın xarici işlər naziri Abbas Əraqçı və parlamentin sədri Məhəmməd Baqir Qalibaf ilə dialoqda maraqlı olub. ABŞ İsrail tərəfinə Əraqçı və Qalibafın likvidasiyasından çəkinmək xahişini çatdırsa da, cavabında etibarlı zəmanət ala bilməyib. Bu amil ABŞ-ni hər iki məmurun təhlükəsizlik tədbirlərinin gücləndirilməsi zərurəti barədə İran tərəfini birbaşa xəbərdar etməyə vadar edib.

Qəzetin məlumatına görə, ABŞ və İsrail arasında İran liderlərinin sıradan çıxarılması ilə bağlı ziddiyyətlər İranın Ali Milli Təhlükəsizlik Şurasının katibi Əli Laricaninin ölümündən sonra yaranıb.

"Dönüş nöqtəsi ali liderin öldürülməsi yox, Laricaninin likvidasiyası oldu. ABŞ əməkdaşlıq edə biləcəyi iranlı məmur axtarırdı, o isə qəfildən yoxa çıxdı", - nəşrin mənbələrindən biri vurğulayıb.