ABŞ və Böyük Britaniya Yəməndə hərbi əməliyyat başlatdı – Nə baş verir?

Bu gecə ABŞ və Böyük Britaniya silahlı qüvvələri Yəmənin üsyançı hərəkatı “Ənsar Allah”ın (husilər) hədəflərinə hücum edib.

Yeniavaz.com xarici KİV-ə istinadla xəbər verir ki, iki Qərb dövlətinin nümayəndələrinin sözlərinə görə, husilərin raketlərinin yerləşdiyi yerlər, pilotsuz təyyarələr və radar stansiyaları vurulub.

Ölən və yaralananlar barədə məlumat yoxdur.

Qeyd edək ki, Fələstin-İsrail münaqişəsinin şiddətlənməsindən sonra husilər İsrail ərazisinə zərbələr endirəcəklərini və bu ölkə ilə əlaqəli gəmilərin Qırmızı dəniz və Bab əl-Məndəb boğazı sularından keçməsinə icazə verməyəcəklərini bildiriblər.

Yanvarın 11-də axşam “The Times” qəzetinin jurnalisti Stiven Svinford “X” (keçmiş Tvitter) səhifəsində yazıb ki, Böyük Britaniyanın Baş naziri Rişi Sunak Nazirlər Kabineti ilə “Ənsar Allah”ın Qırmızı dənizdəki hərəkətlərinə Qərb koalisiyasının mümkün cavabını müzakirə edəcək. Axşam saatlarında isə jurnalist Böyük Britaniya və ABŞ-nin yaxın vaxtlarda Yəmənə zərbələr endirəcəyini xəbər verdi.

Husilər isə bəyan etdilər ki, ABŞ və Böyük Britaniya Yəmənə hava zərbələri endirərsə, cavab tədbiri görəcəklər.

Bu açıqlamadan bir müddət sonra “Al Hadath TV” xəbər verib ki, ABŞ və Böyük Britaniyanın silahlı qüvvələri Hudeydə liman şəhəri yaxınlığında husilərin mövqelərinə zərbələr endiri. “Reuters” agentliyi də Amerika rəsmilərinə istinadən, zərbələr barədə məlumatu təsdiqləyib.

“Al Hadath”a görə, Səna, Səda, Hodeyda, Taiz və Damar şəhərlərində partlayışlar baş verib.

“Sky News” isə Səna Beynəlxalq Hava Limanının güclü bombardmana məruz qaldığını bildirib.

Amerika televiziya kanalı “NBC News”un məlumatına görə, Amerika və Böyük Britaniya hərbçiləri “Tomaqavk” qanadlı raketləri ilə gəmilərdən zərbələr endiriblər.

“Reuters” isə yazıb ki, husilərin mövqelərinə zərbələr təyyarə, gəmi və sualtı qayıqlardan həyata keçirilib.

ABŞ Prezidenti Co Bayden Yəməndəki zərbənin husilərin Qırmızı dənizdə misli görünməmiş hücumlarına cavab olduğunu bəyan edib. O bildirib ki, zərbələr Avstraliya, Bəhreyn, Kanada və Hollandiyanın dəstəyi ilə həyata keçirilib.

ABŞ və Böyük Britaniya liderləri qeyd ediblər ki, zərbələr müdafiə xarakteri daşıyır.

Böyük Britaniyanın Baş naziri Rişi Sunak isə husiləri mülki gəmiləri atəşə tutmağı dayandırmağa və gərginliyi azaltmaq üçün addımlar atmağa çağırıb.

Vaşinqton Yəməndəki husilərə cavab olaraq hərbi və azad beynəlxalq ticarəti qorumaq üçün əlavə tədbirləri istisna etməyib.

Husi rəhbərliyinin sözçüsü Abdullah bin AmerƏl-Cəzirə bildirib ki, hərəkat regiondakı ABŞ və Böyük Britaniya bazalarını vuracaq.

Yəmən Xarici İşlər Nazirliyinin sədr müavini Hüseyn əl-Əzi isə bildirib ki, Yəmənə qarşı kütləvi hücumlara görə London və Vaşinqton “yüksək qiymət” ödəməyə hazır olmalıdırlar.

Rusiya isə ABŞ və Böyük Britaniyanın Yəmənə endirdiyi zərbələrlə əlaqədar yanvarın 12-də BMT Təhlükəsizlik Şurasının təcili iclasının keçirilməsini tələb edib.

Səudiyyə Ərəbistanı bölgədə təmkinli olmağa və gərginliyin qarşısını almağa çağırıb.