AFFA stadionda pəncərə sındıran legionerlə bağlı qərarını açıqlayıb

Bu gün AFFA-nın İntizam Komitəsinin iclası keçirilib.

ONA-nın məlumatına görə, yığıncaqda Azərbaycan Kubokunun 1/2 mərhələsinin ilk oyunları, həmçinin Topaz  Premyer Liqasının XXVI turunda baş verənlər müzakirə olunub.

Kubokun “Qəbələ” – “Qarabağ” matçında meydan sahiblərinin 4 futbolçusu sarı vərəqə ilə cəzalandığı üçün klub 800 manat cərimələnib.

Premyer Liqanın “Sabah” – “Keşlə” matçında qonaqların 5 futbolçusu sarı vərəqə ilə cəzalandığı üçün klub 800 manat cərimələnib. Oyun başa çatdıqdan sonra “Keşlə”nin legioner futbolçusu Edvinas Girdvainis stadionun koridorunun pəncərəsini əli ilə sındırıb. Stadiona dəymiş ziyan “Sabah”ın təqdim edəcəyi hesab əsasında “Keşlə” klubu tərəfindən ödənilməlidir.

“Zirə” – “Qarabağ” görüşündə qəsəbə klubunun 4 futbolçusu sarı vərəqə ilə cəzalandığı üçün 800 manat cərimələnib. “Səbail” – “Qəbələ” matçında 4 futbolçusu sarı vərəqə alan ev sahiblərinin cəriməsi də eyni olub.