Ağır atletimiz Tarmenxan Babayev Avropa Çempionatında qızıl medal qazanıb
22-29 iyul tarixlərində İtaliyanın Milan şəhərində keçirilən 15 və 17 yaşa qədər yeniyetmə oğlan və qızlar arasında ağır atletika üzrə Avropa birinciliyi başa çatmaq üzrədir.
Trend-ə Azərbaycan Ağır Atletika Federasiyasından verilən məlumata əsasən, 40-a yaxın ölkədən 388 atletin (169 qız və 219 oğlan) iştirak etdiyi turnirdə Azərbaycan yığmasının üzvləri də körpücük üzərinə çıxıblar. Millimizin üzvlərindən son olaraq Tarmenxan Babayev mübarizəyə qoşulub. O, yaşı 17-yə qədər oğlanların 94 kq çəki dərəcəsində qüvvəsini sınayıb.
Ötən il Kosovonun paytaxtı Priştinada 6 Avropa rekordu yeniləyərək çempion olan Tarmenxan Babayev bu dəfə də uğurunu təkrarlayıb.
Atletimiz birdən qaldırma hərəkətində 145 kq nəticə göstərərək bu hərəkətdə gümüş medala sahib çıxıb.
Təkanla qaldırma 180 kq nəticə göstərən Babayev, bu hərəkətdə bütün rəqiblərini üstələyərək qızıl medal əldə edib.
Toplam 325 kq (145+180) nəticə ilə Tarmenxan 94 kq çəki dərəcəsində yekun sıralamada hamıdan üstün olub və fəxri kürsünün ən yüksək pilləsinə qalxaraq Avropa birinciliyinin ikiqat qalibi adını qazanıb.
Şərhlər
Şərhləri göstər Şərhləri gizlət