AQTA sədri sertifikatların baha olması ilə bağlı sahibkarların narazılığına münasibət bildirib

 Azərbaycan Qida Təhlükəsizliyi Agentliyinin (AQTA) sədri Qoşqar Təhməzli kənd təsərrüfatı məhsulları üçün tələb olunan sertifikatların qiymətinin baha olması ilə bağlı sahibkarların narazılığına münasibət bildirib.

"Report" xəbər verir ki, agentliyin sədri  "Azərbaycan regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının yekunlarına həsr olunan konfransda çıxışı zamanı hazırlanan dövlət rüsum və tariflərin ekspertizaya sərf olunan kompanentlərin, inqridentlərin hesablamasına əsasən təyin olunduğunu deyib.

Onun sözlərinə görə, AQTA yaradılana qədər ölkədə aqrokimyəvi preparatların ekspertizası 10 manata həyata keçirilirdi: "Lakin bir pestisidin ekspertizasının həyata keçirilməsi üçün onun maya dəyəri, taksikoloji analizləri 170 manata başa gəlir. Ona görə də hazırda həmin məhsulların ekspertizası dövlət tərəfindən qazanc məqsədi ilə həyata keçirilmir. Bu sadəcə ekspertizanı həyata keçirmək üçün heç olmasa minimum sərf olunan reaktivlərin və ləvazimatların maya dəyərini ödəmək üçün edilir".

Q.Təhməzli qeyd edib ki, sahibkarlar üçün təqdim edilən rəqəmlər maya dəyərindən aşağıdır: "Bir çox hallarda dövlət onun böyük hissəsini öz üzərinə götürür. Nəzərə almaq lazımdır ki, qonşu ölkələrdə belə sertifikatların qiyməti qat-qat bahadır. İstər qida, istərsə də qeyri-qida məhsulları ilə bağlı dövlət tərəfindən sahibkarlara kömək edilir. Yəni həm idxal, həm də ixrac zamanı ekspertizaların həyata keçirilməsi Tarif Şurası tərəfindən müəyyən olunmuş rəqəmlərə əsasən təyin olunur. Hesablanmış tariflər hazırda qazanc məqsədi ilə deyil, minimum sərflərin ödənməsini təmin edir. Hesab edirəm ki, bu sahədə dövlət kifayət qədər yükü öz üzərinə götürür".