Aşıq Heydər - Nədi

Aşıq Heydər - Nədi

Boy-buxun, sir-sifət, cavanlıq səndə,
Bulud tək tutulub dolmağın nədi?
Dərd-sərini söylə, bir biz də bilək,
Heyva tək saralıb solmağın nədi?

Qaradan qaradı o baxt dediyin,
Əlbət ki, varlıdı xoşbəxt dediyin.
Yerini alarmı hər vaxt dediyin,
Dərdi sinən üstə almağın nədi?

Aşıq Heydər deyər, bir az tab elə,
Aç sinədəftərin, bir kitab elə.
Səxalı bəylərə bir xitab elə,
Baxtın qarasında olmağın nədi?