Aşıq İsmi - Gəl mənə

Aşıq İsmi - Gəl mənə

Həsrətindən oldum dəli,
Gözəl, gəl mənə, gəl mənə.
Ətəyindən üzmə əlim,
Gözəl, gəl mənə, gəl mənə.

Zülfün siyah, belin incə,
Heç kim sevməz səni məncə.
Baxma bir qocaya, gəncə,
Gözəl, gəl mənə, gəl mənə.

Qadanı-balanı alım,
Desən, gəl qulum ol, ollam.
Dərdindən saralıb-sollam,
Gözəl, gəl mənə, gəl mənə.

Aşıq İsmi sənə qurban,
Gözüm yaşdır, ürəyim qan.
Sənsən dərdlərimə dərman,
Gözəl, gəl mənə, gəl mənə.