Aşıq Musa - Məndən

Gecə-gündüz ahu kimi mələrəm,
Yetişirmi sənə nalalar məndən?!
Fərhad olub, dağı-daşı dələrəm,
Hürküşür göllərdə sonalar məndən.

Mən nə desəm, sən incimə dilimdən,
Sübhə kimi aləm yatmaz ünümdən.
Bir öpəydim yanağının gülündən,
Usanıb qönçələr, lalalar məndən.

Musa deyir, bu sözümdən küsmə sən,
Təbib olub, qədəmlərin basmasan .
Öz əlinlə yaralarım açmasan,
Öldürər, qurtarmaz yaralar məndən.