![Aşıq Səməd - Ustad Səməd ilə aşıq Valehin 3-cü deyişməsi](https://ens.az/images/news/f85b1e42e28f524a2c38823f1a060a75.jpg)
Aşıq Səməd - Ustad Səməd ilə aşıq Valehin 3-cü deyişməsi
Aşıq Səməd
Fikrin-zikrin gəzir uca göyləri,
Söylə görüm, Valeh, hara gedirsən?
Karvanların qatar-qatar dayanıb,
Söylə görüm, Valeh, hara gedirsən?
Aşıq Valeh
Fikrim edir asimanı ziyarət,
Eşit, ustad, deyim hara gedirəm.
Yükümü tutmuşəm ərşi-əladan,
Sevda üçün bir bazara gedirəm.
Aşıq Səməd
Yükünü tutmusan ərşi-əladan,
Qatarların gəlsin dərdi-bəladan.
Nəcəf çöllərindən, Məkkə binadan,
Söylə görüm, oğlum, hara gedirsən?
Aşıq Valeh
Dərsimi vermisən torət, qurandan,
İncildən, zaburdan, külli cahandan.
Yerdən, göydən, ərşdən, kürşdən, gümandan,
Onlar ilə zəncir dara gedirəm.
Aşıq Səməd
Səməd içib minbir eşqin camını,
Əzbər deyər hər xilqətin sanını.
Sənə bağışlayır öz karvanını,
Sahib sənsən, o bazara gedirsən.
Aşıq Valeh
Zərnigar Dərbənddə dönüb aslana,
Otuz doqquz aşıq salıb zindana.
Valehi çağırır deyiş meydana,
Canım ustad, o meydana gedirəm.
Şərhlər
Şərhləri göstər Şərhləri gizlət