Aşıq Tüccar - Gümrünün

Aşıq Tüccar - Gümrünün

Karvan gələr, karvan gedər, 
Nə çoxdu alı Gümrünün. 
Tükənməz malı-sərvəti, 
Dövləti-malı Gümrünün. 
Görənləri heyran edir, 
Cahı-calalı Gümrünün. 
Tacirinin, tüccarının, 
Xocasının hesabı düz, 
Alış-verişi yerində 
Yaxşıdı halı Gümrünün.

Ərdahana, Qağızmana,
Qarsa, Boluya yol işlər 
Bura elə ucuzluqdur, 
Qızıldı qara quruşlar, 
Dörd tərəfi bağ-bağatdı, 
Dağlarında ötür quşlar, 
Ağaları səxalıdır, 
Kasıb-kusubu bağışlar,
Dədələri ad alıbdı,
Həm əhli-halı Gümrünün.

Aşıq Tüccar, sözünü de,
Ürəyində qoy qalmasın.
Elə bir gün, olarmı ki,
Bir məhlədə toy olmasın
Məclis məclis sayılarmı,
Orda haqqı-say olmasın;
Yığnaqda, xeyir işlərdə
Gərək ağlı zay olmasın,
Nizami yerli-yerində,
Yox qeylü-qalı Gümrünün