![Azərbaycan alimləri Sankt-Peterburqda keçirilən beynəlxalq forumda iştirak ediblər](https://ens.az/images/news/a4ebbbcc1aa4dd256ff97889b666b7f1.jpg)
Azərbaycan alimləri Sankt-Peterburqda keçirilən beynəlxalq forumda iştirak ediblər
Azərbaycan Milli Elmlər Akademiyasının prezidenti, akademik Akif Əlizadənin başçılıq etdiyi nümayəndə heyəti Rusiya Elmlər Akademiyasının Şərq Əlyazmaları İnstitutunun 200 illik yubileyinə həsr olunmuş “Rusiya və Şərq. Rusiya akademik şərqşünaslığının 200 illiyi” adlı beynəlxalq forumda iştirak edib. Nümayəndə heyətinin tərkibində AMEA Humanitar Elmlər Bölməsinin akademik-katibi, Əlyazmalar İnstitutunun direktoru, akademik Teymur Kərimli, AMEA İctimai Elmlər Bölməsinin akademik-katibi, akademik Nərgiz Axundova, AMEA akad. Z.M.Bünyadov adına Şərqşünaslıq İnstitutunun direktoru, akademik Gövhər Baxşəliyeva və digər alimlər olublar.
Forumun təntənəli açılış mərasimində Rusiya Federasiyasının Prezidenti V.Putinin, Sankt-Peterburq şəhərinin qubernatoru A.Beqlovun, REA-nın prezidenti, akademik A.Sergeyevin və REA-nın Sankt-Peterburq Elmi Mərkəzinin prezidenti, akademik J.Alfyorovun salamlama məktubları səsləndirilib. Mərasimdə akademik Akif Əlizadə geniş nitqlə çıxış edərək REA Şərq Əlyazmaları İnstitutunun çoxsaylı kollektivini yubiley münasibətilə təbrik edib, Azərbaycan əlyazmaları haqqında kitabları Şərq Əlyazmaları İnstitutunun direktoru, prof. İ.Popovaya təqdim edib.
Forumun ikinci günü “Avrasiya məkanında akademik şərqşünaslıq: tarix və perspektivlər”, “Keçmiş Rusiya imperiyası ərazisində İslam”, “Xristian Şərqinin öyrənilməsi: qırılmış ənənələrin bərpası”, “Türk-monqol dünyası əlyazma və sənədlərdə” və s. adlı dəyirmi masalar təşkil olunub. Dəyirmi masalarda akademiklər Nərgiz Axundova, Teymur Kərimli, Gövhər Bəxşəliyeva, Şahin Mustafayev və digərləri iştirak ediblər.
Növbəti gün akademik Akif Əlizadə Sankt-Peterburq Həmkarlar İttifaqları Humanitar Universitetində təşkil olunan tədbirdə “Müasir Azərbaycan elmi” adlı mühazirə ilə çıxış edib, Azərbaycan dövlətinin elm və təhsilin inkişafına ayırdığı diqqət və qayğıdan danışıb. Universitetin rektoru, professor Aleksandr Zapesotski ilə görüş zamanı gələcək əməkdaşlıq əlaqələri müzakirə olunub. A.Zapesotski AMEA rəhbərinin mühazirəsinin “Universitetin seçilmiş əsərləri” silsiləsindən olan toplunun növbəti sayında yer alacağını bildirib.
Akademik Akif Əlizadə həmçinin, Azərbaycanın Sankt-Peterburqdakı Baş konsulluğunda baş konsul Sultan Qasımovla işgüzar görüş keçirib.
AMEA Rəyasət Heyətinin aparatı
Mətbuat və informasiya idarəsi
İctimaiyyətlə əlaqələr
şöbəsi – Mətbuat xidməti
Şərhlər
Şərhləri göstər Şərhləri gizlət