Azərbaycan gimnastı Bakıda keçiriləcək Dünya Kubokunda qızıl medal qazanmaq niyyətindədir

Doğma şəhərdə çıxış etmək həmişə daha çətin və daha məsuliyyətlidir.

Bu barədə Trend-ə Bakıda keçiriləcək batut gimnastikası və tamblinq üzrə Dünya Kubokunda Azərbaycanı təmsil edəcək gimnast Mixail Malkin bildirib.

M.Malkin deyib: "Bəzən uğursuz məşqlər olur, amma biz yenədə özümüzü ələ almağa çalışırıq. Bu məsuliyyətli startdır. Öz doğma şəhərində çıxış etmək həmişə daha çətindir. Azarkeşlər medala ümid edir".

Gimnast qeyd edib ki, Dünya Kubokunun başlamasına 2 həftə qalıb və o, tam formadadır: "Mən yalnız "qızıla" köklənmişəm".

M.Malkin bildirib ki, Milli Gimnastika Arenasında əla şərait yaradılıb: "Əgər belə şərait olmasaydı, mən düşünürəm ki, mən belə səviyyəyə qədər çata bilməzdim".

Gimnast həmçini qeyd edib ki, Rusiyalı gimnastı ən güclü raqib hesab edir.

Turnirdə 31 ölkədən 200-dən artıq gimnastın mübarizə aparacağı gözlənilir. 2019 və 2020-ci illərdə Tokio Yay Olimpiya Oyunlarına batut gimnastikası üzrə təsnifat xarakterli 8 Dünya Kuboku yarışı keçiriləcək. Paytaxtımız isə bu kuboklardan ikisinə ev sahibliyi edəcək.

Ötən il Bakıda 26 ölkənin iştirakı ilə gimnastikanın bu növü üzrə Avropa çempionatı, daha öncəki illərdə isə Dünya kubokları (2016-cı il 17 ölkə, 2017-ci il 15 ölkə) təşkil olunub. Bu il baş tutacaq yarışa marağın səbəbi isə kubokun təsnifat xarakterli olmasıdır.

Ölkəmizi turnirdə batut yarışlarında qadınlar arasında fərdi proqramda son Avropa çempionatının gümüş medalçısı Veronika Zemlyanaya, kişilər arasında sinxron və fərdi proqramlarda Ruslan Ağamirov, İlya Qrişunin, Oleq Piunov və tamblinq cığırında Avropa çempionumuz Mixail Malkin təmsil edəcəklər.

İki gün davam edəcək yarışların ilk günü təsnifat mərhələləri, ikinci günü isə final mərhələləri baş tutacaq.

Turnirdə ən yüksək icra xalını toplamış gimnastlara ənənəvi “AGF Trophy” kuboku da təqdim olunacaq.