Azərbaycan Texnologiya Universitetində (ATU) 27 Sentyabr - Anım Gününə həsr edilmiş tədbir keçirilib

Azərbaycan Texnologiya Universitetində (ATU) 27 Sentyabr - Anım Gününə həsr edilmiş tədbir keçirilib

Tədbirdə Vətən Müharibəsi şəhidlərinin ailə üzvləri və qazilər iştirak edib. 

Tədbirdən öncə universitetin həyətində ATU-nun şəhid məzun və tələbələrinin xatirəsinə ucaldılmış abidə ziyarət edilib, önünə gül dəstələri düzülüb. 

Tədbir Azərbaycan Respublikasının Dövlət Himninin səsləndirilməsi və Vətənin ərazi bütövlüyü uğrunda canından keçən şəhidlərimizin əziz xatirəsinin bir dəqiqəlik sükutla yad edilməsilə açıq elan edilib.

Sonra fəxri qonaqlar və ATU kollektivi üçün “44 Gün, 44 An” adlı sənədli film nümayiş etdirilib. 40 dəqiqə davam edən film zalda duyğulu anlar yaşadıb. 

Daha sonra Azərbaycan Texnologiya Universitetinin rektoru v.m.i.e dos. Yaşar Ömərov çıxış edib, Ali Baş Komandan İlham Əliyevin rəhbərliyi ilə rəşadətli Azərbaycan Ordusunun qüdrətindən, mübariz əsgər və zabitlərdən, o cümlədən ATU-nun Vətən Müharibəsinə qoşulan şəhid məzun və tələbələrindən danışıb. 

YAP Gəncə Şəhər təşkilatının sədri Bayram Aslanov isə çıxışında Azərbaycan gəncliyinin vətənpərvər ruhda yetişməsindən, İkinci Qarabağ Müharibəsində şəhid və qazilərin misilsiz qəhrəmanlıqlarından bəhs edib. 

Gəncə şəhidi Nurhan Abbasovun anası Səidə Abbasova bütün şəhid anaları timsalında çıxış edərək öz duyğulu hisslərini bölüşüb.

Tədbirdə həm də Azərbaycan Texnologiya Universitetinin magistratura pilləsinin birinci kurs tələbəsi, Vətən müharibəsi şəhidi Anar Qarayevin qardaşı Allahverdi Qarayev, Gəncə şəhidi Mərhab Əliyevin qardaşı, Vətən müharibəsi iştirakçısı Şöhrət Əliyev, Azərbaycan Texnologiya Universitetinin qazi tələbəsi Gündüz Abdullayev çıxış edərək 44 günün həm ağrılı, həm də qürurlu anlarından danışıblar. 

ATU-nun qazi məzununun valideyni, eyni zamanda Maşın mühəndisliyi və logistika kafedrasının müdiri dos. Şakir Əliyev və universitetinin əməkdaşı, I Qarabağ müharibəsi qazisi İsfəndiyar Hacıyev həmin illəri bir daha xatırlayaraq bütün şəhidlərə Allahdan rəhmət diləyib, universitetin şəhid tələbə və məzunlarının ailələrinə və qazi tələbələrə diqqətinin nümunə olduğunu qeyd edərək öz təşəkkürlərini bildiriblər.