Azərbaycan və Malayziya turizm sahəsində əməkdaşlıq edəcək

 Kuala-Lumpurda Azərbaycan Turizm Assosiasiyası (AzTA) və Malayziya Turizm Agentlikləri Assosiasiyası (MTAA) arasında turizm sahəsində əməkdaşlıq haqqında memorandum imzalanıb.

Bu barədə "Report"a AzTA-dan bildirilib. 

Məlumata görə, sənədi Azta-NIN İdarə Heyətinin sədri Nahid Bağırov və MTAA-nın sədr müavini Akil Yusof imzalayıb.

Memorandumun imzalanması münasibətilə Malayziya Turizm Mərkəzində təşkil olunmuş “Turizm sahəsində Azərbaycan-Malayziya Əməkdaşlığı Proqramı” adlı tədbirdə AzTA-nın nümayəndə heyəti, Malayziyanın Turizm, İncəsənət və Mədəniyyət Nazirliyinin nəzdindəki Malayziya Turizmin Təşviqi Şurasının və Malayziya Turizm Agentlikləri Assosiasiyasının rəsmiləri, ölkə ictimaiyyətinin, o cümlədən turizm agentliklərinin və kütləvi informasiya vasitələrinin nümayəndələri, eləcə də Azərbaycanın Malayziyadakı səfirliyinin təmsilçisi iştirak ediblər.

Tədbirdə Malayziya Turizmin Təşviqi Şurasının Beynəlxalq təşviq idarəsinin baş direktoru Zulkafli Yahya, eləcə də A.Yusof və N.Bağırov çıxış ediblər.

Malayziyada turizm sektorunun ölkənin valyuta gəlirində payına görə ikinci, ümumi milli gəlirdə payına görə isə üçüncü yerdə olduğu diqqətə çatdırılıb. 2017-ci ildə Malayziyaya səfər edən xarici turistlərin sayının 2010-cu illə müqayisədə 5,3% artaraq 25,9 mln. nəfərə çatdığı, göstərilən dövrdə turizm sahəsindən gəlirin 45,5% artaraq 21,14 mlrd.  ABŞ dollarına yüksəldiyi qeyd edilib.

2017-ci ildə Azərbaycandan Malayziyaya səfər edən turistlərin sayının 2016-cı illə müqayisədə 12,1% artaraq 1 035 nəfərə çatdığı, bu göstəricinin 2018-ci ilin yanvar-aprel aylarında 2017-ci ilin müvafiq dövrü ilə müqayisədə 18,8% artaraq 448 nəfər təşkil etdiyi bildirilib.

Azərbaycanla Malayziya arasında turizm sahəsində qarşılıqlı faydalı əməkdaşlığın inkişaf etdirilməsi üçün geniş imkanların olduğu qeyd edilərək, bu istiqamətdə birgə səylərin davam etdirilməsinin vacibliyi vurğulanıb.

AzTA-nın nümayəndə heyəti Azərbaycanın Malayziyadakı səfirliyində də olub, yerli turizm şirkətləri ilə görüş keçirilib.