Azərbaycan və Ukraynanın futbol veteranları yoldaşlıq görüşü keçirəcək

UEFA Avropa Liqasının qrup mərhələsində keçirilmiş “Qarabağ” – “Vorskla” oyununu izləmək üçün Ukrayna Futbol Federasiyasının (UFF) prezidenti Andriy Pavelko Bakıda səfərdə olub.

Trend-in məlumatına görə, Bakı Olimpiya Stadionunda Azərbaycan Futbol Federasiyaları Assosiasiyasının prezidenti Rövnəq Abdullayevlə A.Pavelko arasında görüş keçirilib. Söhbət zamanı AFFA ilə UFF arasında qarşılıqlı əməkdaşlığın yüksək səviyyədə olduğu bildirilib, gələcəkdə də hər iki ölkənin futbol qurumlarının müxtəlif istiqamətlər üzrə tərəfdaşlıq etməsinin perspektivləri müzakirə olunub.

Avropa Liqası turnirinin 2019-cu ildə Bakı Olimpiya Stadionunda keçiriləcək final oyununun təbliğat kampaniyası çərçivəsində Azərbaycan və Ukraynanın futbol veteranları arasında gələn il yoldaşlıq oyununun təşkil olunması barədə fikir mübadiləsi aparılıb, ilkin razılığa gəlinib.

A.Pavelko Ukrayna Futbol Federasiyanın nümayəndə heyəti adından görüşün təşkili və səmərəli müzakirələrə görə minnətdarlığını bildirib.