![Azərbaycana ən çox bu ölkələrdən gəliblər](https://ens.az/images/news/f27531d9bb6bf5f03907f34a5d22e040.jpg)
2018-ci ilin ilk 8 ayında Azərbaycana iki milyon xarici vətəndaş səfər edib.
"Kommersant.az" Dövlət Turizm Agentliyinin açıqladığı məlumatlara istinadla xəbər verir ki, bu, 2017-ci ilin ilk 8 ayı ilə müqayisədə 8,5% çoxdur.
Avqust ayında artım, əsasən İrandan gələn səyahətçi axınının azalması ilə əlaqədar olaraq, iyun (10,8%) və iyul (5,3%) aylarından az olub. 2018-ci ilin avqust ayında Azərbaycana gəlmiş 20,3 min iranlı, keçən ilin avqust ayında gəlmiş 39,5 min iranlıdan təqribən 2 dəfə azdır. 2018-ci ilin ilk səkkiz ayında Azərbaycana səfər etmiş iranlıların sayı 2017-ci ilin eyni dövrü ilə müqayisədə 25%-dən çox azalaraq, 250 mindən 186 minə düşüb.
İrandan gələn səyahətçilərin axınının azalması Yaxın Şərq və Asiya ölkələrindən gələnlərin sayının ciddi şəkildə artması ilə qismən kompensasiya edilib. 2017-ci illə müqayisədə Yaxın Şərqdən gələn səyahətçilərin sayı avqust ayında 25%, 2018-ci ilin ilk səkkiz ayında isə 46% artaraq, 195 mindən 284 minə qalxıb. Ən yüksək artım İraq (19,2%), Bəhreyn (142%), Küveyt (123,9%), Qətər (86,6%) və İsraildən (240,7%) gələn səyahətçilər arasında müşahidə olunur. Asiya ölkələrindən gələnlərin sayı avqust ayında 68%, 2018-ci ilin ilk səkkiz ayında isə 59% artıb, yəni 86 mindən 136 minə çatıb. Ən yüksək artım Hindistan (210,1%), Pakistan (181,6%), Türkmənistan (75,6%) və Çindən (57%) gələn səyahətçilər arasında müşahidə edilir.
Tarixi baxımdan, Azərbaycan üçün ən böyük bazarlar Rusiya, Gürcüstan, İran və Türkiyə olub. Avqust ayında Rusiyadan təqribən 3%, 2018-ci ilin ilk səkkiz ayında isə ümumilikdə 623 min olmaqla, 5% daha çox səyahətçi gəlib. Daha yüksək artım Gürcüstandan gələn səyahətçilər arasında müşahidə edilir. Belə ki, burada avqust ayında artım 16%, 2018-ci ilin ilk səkkiz ayında isə 10% təşkil edir. Səyahətçilərin sayı 2018-ci ilin müvafiq müddətində 2017-ci illə müqayisədə 350 mindən 385 minə qalxıb. Türkiyədən gələn səyahətçilərin sayı avqust ayında 13% aşağı düşüb, lakin 2018-ci ilin ilk 8 ayında 2017-ci ilin göstəricisi - 194 min olduğu kimi qalıb.
Azərbaycan yay aylarında daha çox Rusiya, Gürcüstan və Yaxın Şərqdən gələn səyahətçiləri qəbul edib. Yaxın Şərqdən gələn səyahətçilər arasında qeyri-adi artım tempi müşahidə olunur (2017-ci ilin yay ayları müqayisədə Yaxın Şərqdən 43,6% daha çox səyahətçi gəlib). Azərbaycana yay ayları ərzində gəlmiş bütün səyahətçilərin 75%-i bu iki ölkə və bir regiondandır.
Şərhlər
Şərhləri göstər Şərhləri gizlət