Azərbaycanda 500 nəfər karantindədir - Açıqlama

Hazırda respublikada 3 nəfər koronavirus daşıyıcısı var. Vəziyyətləri stabildir. Həkim nəzarəti altındadırlar.

Axar.az xəbər verir ki, bunu TƏBİB-in şöbə müdiri Yaqut Qarayeva Nazirlər Kabineti yanında Operativ Qərargahın koronavirusla bağlı keçirilən brifinqində deyib.

“29 fevral tarixindən İranla sərhəddə məhdudlaşdırılmış rejim tətbiq olundu. İrandan Azərbaycana keçmək istəyənlər isə Tehran səfirliyinin baş konsulluğu vasitəsilə ölkəyə daxil olurlar. Onların bütün marşrutları karantin olunan sahəyə qədər planlaşdırılıb", - şöbə müdiri bildirib.

Yeganə Qarayeva qeyd edib ki, karantində olan şəxslərdən laborator diaqnostika nümunələri alınır:

“COVİD-19 yeni virus olduğu üçün laborator nümunələri yenidir. Bu virusun diaqnostikası sadəcə Operativ Qərargah tərəfindən təyin olunmuş laboratoriyada ola bilər. Ölkəmiz testlərin alınmasına başlayıb. Bu testlər yalnız Səhiyyə Nazirliyi və TƏBİB tərəfindən təyin olunmuş laboratoriyalarda aparıla bilər. Hazırda bu testlərin istehsalı başlanıb. Ölkə olaraq bu testlərin keçirilməsində çətinlik olacağını düşünmürük”.

Şöbə müdiri hazırda 500 nəfərin karantində müşahidə altında olduğunu deyib:

“Onlardan hazırda diaqnostika üçün nümunələr götürülüb. Heç kimdə xəstəlik aşkar olunmayıb. Lakin 14 gün karantində qalacaqlar. Onların böyük qismi Azərbaycan vətəndaşıdır və cənub zonasındandırlar. Paytaxt sakinlərindən heç kim nəzarətə alınmayıb. Tibb personalı qoruyucu geyim və vasitələrlə təmin olunub”.