Azərbaycanda iş günləri azaldıla bilər? - “5 günlük iş həftəsini 3 gün əvəz edərsə...”

Texnologiya nəhəngi “Microsoft” Yaponiyadakı filialının istirahət günü üç günə qədər uzadılıb. 

Belə ki, bir ay davam edən sınaqda şirkətin 2300 işçisinin istirahət gününə əlavə olaraq cümə günləri də daxil edilib. Bu dəyişiklikdən sonra məhsuldarlıq təxminən 40 faiz artıb. 

Maraqlıdır, Azərbaycanda da iş gününün azaldılması mümkündürmü? 

Məsələ ilə bağlı Cebhe.info-ya açıqlama verən Vətəndaşların Əmək Hüquqlarını Müdafiə Liqasının rəhbəri Sahib Məmmədov bildirib ki, Azərbaycanda istirahət günlərinin artırılması mümkün deyil. Çünki Azərbaycanda faydalı iş əmsalı Avropa işçisinin verdiyi faydalı iş əmsalından aşağıdır:

““Microsoft”un Yaponiyada iş vaxtı ilə bağlı belə bir addım atması məxfi məsələdir. Çünki “Microsoft” kompüterlər üçün müxtəlif proqram təminatı hazırlayan şirkətdir. Orada əsas işlər zehni, kompüter arxasındadır. Ona görə də istirahət günlərinin artırılması mümkündür. Amma bunu hər yerdə tətbiq etmək çətindir. Azərbaycana gəldikdə, istənilən istehsal müəssisəsi bu vəziyyətə hazır deyil. Çünki bizim 8 saat ərzindəki faydalı iş əmsalı Avropa işçisinin verdiyi faydalı iş əmsalından aşağıdır. Ona görə də idarəetməni təkmilləşdirmək lazımdır”. 

Sahib Məmmədov iş həftəsinin 3 gün ediləcəyi təqdirdə, məhsuldarlıqda artımın olmayacağını vurğulayıb: 

“Tətbiq olunan avadanlıq, iş rejimi, zəruri əmək şəraitinin yaradılması, əmək alətlərinin müasir tələblərə cavab verməsi və s. burada mühim rol oynayır. Birmənalı demək olmaz ki, sabah hansısa bir müəssisədə 5 günlük iş həftəsini 3 günlük edən kimi istehsalat artımı baş verəcək. Bu baş verməyəcək. Bizdə Konstitusiyanın müəyyən etdiyi 8 saatlıq iş rejiminə əməl olunmur. Xüsusilə özəl sektorda işçini bəzən 10-12 saat işlədirlər. Məsələn, bizdə olan transmilli şirkətlər Konstitusiyanı pozur, 8 saat işlədir, daha sonra əlavə iş saatına cəlb edib onun qarşılığında da ayrıca pul ödəyirlər. İşçilər də nəticədə həvəslənib daha çox işləyir”.