Azərbaycanın turizm potensialı Pakistanda nümayiş etdirilib

Azərbaycan Turizm Assosiasiyası (AZTA) ilk dəfə olaraq Pakistanın Kəraçi şəhərində “Pakistan Travel Mart “(PTM-2018) Beynəlxalq turizm sərgisi və forumunda ölkənin turizm potensialını təbliğ edib.

"Report" bu barədə AZTA-ya istinadən xəbər verir. 

Assosiasiyaya üzv olan 18 şirkət və otel nümayəndələri sərgidə Azərbaycanın turizm potensialı, o cümlədən səyahət, kənd, ov, müalicə, biznes və digər turizm məhsulları haqqında qonaqlara və iştirakçılara məlumat veriblər. Azərbaycanın sərgidə ilk dəfə iştirak etməsinə və yeni istiqamət olmasına baxmayaraq, qonaqlar arasında təqdim və təbliğ edilən məlumatlar ciddi maraqla qarşılanıb.

AZTA üzvləri stend ilə maraqlanan hər bir iştirakçıya Azərbaycanın turizm sənayəsində müşahidə olunan inkişaf, ildən-ilə artan turist axını, eləcə də, ölkədə hökm sürən sabitlik və təhlükəsizlik şəraiti barədə geniş məlumat təqdim ediblər.

Sərgi şərçivəsində keçirilən PTM-2018 Beynəlxalq Forumda AZTA-nın marketinq departamentinin rəhbəri Nərgiz Babayeva və gəlmə turizm komitəsinin üzvü Murad Kərəmov çıxış ediblər. Onlar Azərbaycanın iqtisadiyyatının, o cümlədən qeyri-neft iqtisadiyyatının prioritet sahələrindən olan turizm sektorunda son illərdə yaşanan inkişaf, dövlət tərəfdən turizmin inkişafına verilən dəstək, investorlar üçün yaradılmış şərait və bu tədbirlərin nəticəsi olaraq turizmin real inkişafı barədə məlumat veriblər. Forumda iştirak edən Qədim Sind vilayətinin təhsil, mədəniyyət və turim naziri Sayed Sardar Ali Şah (Syed Sardar Ali Shah) Azərbaycanın turizm sənayəsində nail olunmuş inkişafı və həyata keçirilən tədbirləri yüksək qiymətləndirib.

Sərgidən sonra təşkil olunmuş ziyafətdə Azərbaycan haqqında qısametrajlı film təqdim edilib.

Azərbaycan Turizm Assosiasiasiyası belə tədbirlərdə iştirakı və ölkə turizminin potensialı haqqında verilən məlumatların sözügedən sahənin inkişafına birbaşa təsirinə ümid edir.