Özbəkistan Prezidenti Şavkat Mirziyoyev iyulun 28-də Azərbaycanın yeni təyin olunmuş fövqəladə və səlahiyyətli səfirinin etimadnaməsini qəbul edib.
Ens.Az xəbər verir ki, bu barədə Özbəkistan Prezidentinin mətbuat xidməti məlumat yayıb.
Bildirilib ki, Azərbaycanın Özbəkistandakı yeni fövqəladə və səlahiyyətli səfiri Rəşad Məmmədov etimadnaməsini dövlət başçısına təqdim edib. Mərasim zamanı vurğulanıb ki, hər iki ölkə liderinin siyasi iradəsi sayəsində Azərbaycan və Özbəkistan arasında əlaqələr müttəfiqlik və strateji tərəfdaşlıq səviyyəsinə yüksəlib. Qarşılıqlı ticarət dövriyyəsinin həcmi 40 faiz artıb, birgə müəssisələrin sayı 450-yə çatıb, yükdaşımaların həcmi isə iki dəfə çoxalıb. Eyni zamanda, yaxın gələcəkdə iki ölkənin birgə investisiya portfelinin həcminin 10 milyard dollara çatdırılması hədəfi bir daha təsdiqlənib.
Qarşıdan gələn ali səviyyəli görüşlərin Azərbaycan-Özbəkistan əməkdaşlığının inkişafına yeni təkan verəcəyi xüsusi qeyd olunub.
