Baydenin Zelenskiyə təklifi – Detallar açıqlandı

Davos Forumu çərçivəsində Ukrayna lideri Zelenski ilə görüş zamanı ABŞ-ın milli təhlükəsizlik müşaviri Sallivan ona Prezident Baydenin mesajını çatdıracaq.

Ens.az Axar.az-a istinadən xəbər verir ki, bu barədə “Blumberq” agentliyi məlumat yayıb.

Agentliyin köşə yazarı Andreas Klut iddia edir ki, Ağ Ev Ukraynanın strategiyasının hücumdan müdafiəyə dəyişməsini istəyir:

“Zelenski başa düşür ki, bu, məntiqlidir, baxmayaraq ki, bunu eşitmək və ya açıq şəkildə müzakirə etmək xoşuna gəlməyəcək. Buna görə də o, Sallivan vasitəsilə Baydenə cavab olaraq bildirəcək ki, Ukrayna yalnız Vaşinqton və müttəfiqləri onu lazım olan hər şeyi təmin etdikdə mövqeyini saxlaya bilər”.

Jurnalistin fikrincə, bu, genişmiqyaslı müharibənin başlamasından təxminən iki il sonra mövcud faciəvi vəziyyətdir:

“Zelenski Sallivana hər ikisinin artıq bildiklərini söyləməlidir - tamam, ruslar bizi yuxarıdan pilotsuz təyyarələrlə bombalayarkən biz “Abrams”, “Leopard” və “Challenger” tanklarını palçıq və xəndəklərlə sürməyi dayandıracağıq.

Bunu dayandıracağıq, çünki bu, mənasızdır. Əvəzində Ukraynanın işğal olunmuş hissəsindəki soydaşlarımız onları taleyin ümidinə buraxdığımızı düşünsələr də, əlimizdə olanı saxlamağa çalışacağıq. Bunu ona görə edəcəyik ki, vaxtı Putinin deyil, özümüzün müttəfiqimizə çevirək. Lakin sərhədlərimizi yalnız o halda müdafiə edə bilərik ki, ABŞ və Avropa bizə pilotsuz təyyarələr, raketlər və güllələr, eləcə də istehkamların tikintisi üçün materiallar göndərməyə davam etsin”.

Məqalə müəllifi onu da bildirir ki, Ukrayna prezidenti atəşkəs çağırışlarını rədd etməklə düzgün iş görür:

“Çünki o hesab edir ki, Rusiya bu pauzadan istifadə edəcək və belə bir addım gələcəkdə təslim olmaq mənasını verəcək.

Zelenski və Sallivan başa düşür ki, Bayden Yaxın Şərqdə yeni müharibə, Şərqi Asiyadakı gərginlik və Tramp adlı daxili dağıdıcı qüvvə ilə mübarizə apararkən belə, Kiyevə bu dəstəyi verməlidir. Putin də müdafiənin taktiki üstünlüklərini dərk etdi: o, faktiki olaraq ordusuna işğalı dayandırmağı və əldə etdiyi torpaqlarda möhkəmlənməyi əmr edib. Bu həm də onun üçün strateji məna kəsb edir.

Putin 2024-cü ili Trampın Ağ Evə qayıdacağı və iki prezidentin razılığa gələcəyi ümidi ilə noyabrda keçiriləcək ABŞ seçkisini gözləməyə sərf edəcək”.