Bu gün İstanbulun sayca üçüncü hava limanı istifadəyə veriləcək

 Bu gün İstanbulun sayca üçüncü hava limanı (İstanbul Grand Airport – İGA) istifadəyə veriləcək.

"Report"un Türkiyə bürosu xəbər verir ki, dünyanın ən nəhəg hava limanlarından biri olan və bir çox yenilikləri ilə ilklərə imza atan aeroportun açılışı Türkiyə Cümhuriyyətinin elan edilməsinin 95-ciildönümündə baş tutur.

Hava limanının açılışını Türkiyə Prezidenti Rəcəp Tayyip Ərdoğanedəcək. Rəsmi açılış mərasimi Türkiyə vaxtı ilə 16:00-da baş tutacaq. Açılış mərasimində xarici ölkələrdən dəvət olunmuş prezidentlər, baş nazirlər və dövlət rəsmiləri iştirak edəcəklər. Yeni hava limanının adını açılışda Türkiyə Prezidenti Rəcəp Tayyip Ərdoğan elan edəcək. Hava limanından ilk uçuş Ankara Esenboğa Hava limanına (ESB) həyata keçiriləcək. Daxili reys 45 dəqiqə davam edəcək. İlk beynəlxalq uçuş isə Azərbaycana və Şimali Kipir Türk Cumhuriyyətinə ediləcək. Azərbaycana ilk reys "Boeing 737-800" tipli təyyarəsi ilə noyabrın 1-i, yerli vaxtla 15:55-də, geriyə isə noyabrın 2-si, saat 08:53-də olacaq.

Yeni aeroportdan 350 istiqamətə uçuşlar planlaşdırılır. İlk olaraq burada ildə 90 milyon, daha sonra isə 150 milyon sərnişinə xidmət göstərilməsi nəzərdə tutulur.

On milyard türk lirəsinə başa gələn hava limanında eləcə də mağazalar şəbəkəsi, logistika və sərgi mərkəzləri olacaq.

Qeyd edək ki, hazırda Türkiyədə 55 aeroport fəaliyyət göstərir. Ölkədə ilk hava limanı 1912-ci ildə hərbi məqsədlər üçün tikilib.