Bu tarixdən Bakı Zooparkı bağlanır

Nərimanov rayonu, Bakıxanov küçəsi 29 ünvanında yerləşən Bakı şəhər Zooloji Parkı gələn aydan bağlanacaq

Nərimanov rayonu, Bakıxanov küçəsi 29 ünvanında yerləşən Bakı şəhər Zooloji Parkı gələn aydan bağlanacaq.

 

Unikal.org-un əldə etdiyi məlumata görə, oktyabr ayının 15-nə qədər yenidən qurma işləri ilə əlaqədar Bakı şəhər Zooloji Parkında olan bütün heyvanlar Qaradağ rayonuna köçürüləcək.

 

Məsələ ilə bağlı Bakı Zooloji Parkın direktoru Azər Hüseynov Unikal.org-a açıqlamasında bildirib ki, Bakı Zooloji Parkı hazırda 2.25 hektar ərazisi var:

 

"Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü və dəstəyi ilə parkın ərazisi 2 hektar da artırılaraq yenidən qurma işləri aparılır. Artıq tikintinin birinci mərhələsi başlayıb. Yenidənqurma işlərindən sonra parkın ərazisi 4.25 hektar olacaq. Parkda olan heyvanların şəraiti ən müasir səviyəyə çatdırılacaq. Tikinti işlərinin nə vaxt yekunlaşacağından da xəbərim yoxdur. Bu tikintinin gedişatından aslıdır”.

 

Qeyd edək ki, Bakı heyvanat parkı 2 yanvar 1942-ci ildə yaradılıb. Hazırda Bakı Heyvanat parkının kolleksiyasına 168 növə aid olan 1193 başdan çox heyvan, quş, sürünən və balıqlar daxildir, o cümlədən, 47 növə aid 193 baş məməli heyvan, 70 növə aid 400 baş quş, 11 növə aid 34 baş sürünən, 2 növə aid 4 baş suda-quruda yaşayan, 38 növə aid 562 balıq bu parkda saxlanılır.