Deputat: Himnimizin sözləri Cəmo bəy Cəbrayılbəyliyə məxsusdur

Söhbət Əhməd Cavadın ruhunun narahat edilməsindən getmir və əslində, heç kim onun ruhunu narahat etmir, incitmir. Söhbət dövlət himninin sözlərinin əsl müəllifinin kim olmasından gedir.

Oxu.Az xəbər verir ki, bunu millət vəkili Araz Əlizadə deyib.

O, Əhməd Cavada və himnin musiqisinin müəllifi Üzeyir bəy Hacıbəyliyə hər zaman ehtiramla yanaşdığını bildirib.

“Amma məsələ odur ki, himnin sözlərinin müəllifi Əhməd Cavad deyil, himnin sözlərinin müəllifi Cəmo bəy Cəbrayılbəylidir.

Bu, belədir. Himnimizin sözləri ona məxsusdur. Odur ki, burada kiminsə ruhunun narahat edilməsindən, incidilməsindən söhbət gedə bilməz”, - deyə o əlavə edib.

Qeyd edək ki, dövlət himninin sözlərinin müəllifi məsələsi ətrafında uzun illərdir müzakirələr, mübahisələr, qarşılıqlı ittihamlar davam edir. Ötən əsrin 90-cı illərinin sonları və 2000-ci illərin əvvəllərindən dəfələrlə bu məsələ ziyalılar, yazıçı və şairlər, ədəbiyyatçılar tərəfindən gündəmə gətirilib. Bir qisim himnin sözlərinin müəllifinin Cəmo bəy Cəbrayılbəyli, böyük əksəriyyət isə məhz Əhməd Cavad olduğunu iddia edir.

Himnin sözlərinin müəllifi məsələsi ilə bağlı müzakirələr qızışarkən Xalq şairi, sabiq millət vəkili, mərhum Vaqif Səmədoğlu bu müzakirələrin əsassız olduğunu demişdi. O qeyd etmişdi ki, Əhməd Cavadın himnimizin mətn müəllifi olaraq qəbul edilməsi əsaslandırılmış şəkildədir.