Donald Tramp: "Paris tezliklə müsəlman şəhərinə çevriləcək"

ABŞ Prezidenti Donald Tramp bəyan edib ki, Fransanın paytaxtı Paris nəzarətsiz immiqrasiya səbəbindən tezliklə müsəlman şəhərinə çevriləcək.

Oxu.Az "İnterfaks"a istinadən xəbər verir ki, o, Vaşinqtonda jurnalistlərə açıqlamasında bildirib:

"Oraya dünyanın hər yerindən insanlar gəlirlər. Nəticədə, Paris yaxın vaxtlarda müsəlman şəhəri olacaq. Lakin tamamilə başqa bir şey planlaşdırılırdı".

Fransa şəhərlərində baş verən son iğtişaşları şərh edən Tramp gördüklərindən kədərləndiyini və Fransa Prezidenti Emmanuel Makrona immiqrantlar üçün giriş qaydalarını sərtləşdirməyi çoxdan məsləhət gördüyünü qeyd edib. "Orada baş verənlərin səbəbi məktəblərlə bağlı problem və ya başqa bir şey deyil, məhz immiqrasiyadır", - deyə o əlavə edib.

Qeyd edək ki, Fransanın hər yerində əhalinin alıcılıq qabiliyyətinin zəifləməsi və yanacaq qiymətlərinin bahalaşmasına etiraz olaraq genişmiqyaslı aksiyalar baş tutub. Təşkilatçıların məlumatına əsasən, mitinqlərə 800 min insan qatılıb, lakin Daxili İşlər Nazirliyi bu rəqəmin 550 min olduğunu bildirib. Bir sıra şəhərlərdə nümayişlər asayişin pozulması və hüquq-mühafizə orqanlarının əməkdaşları ilə toqquşmalarla müşayiət olunub. Son məlumatlara görə, ölkə miqyasında 2 400 nəfər saxlanılıb. Rəsmi dairələr talan və iğtişaşlarda iştirak edən bütün şəxslərin qanun çərçivəsində təqib ediləcəyini və cəzalandırılacağını bəyan ediblər.