Donald Tramp xalqa müraciət etdi: Ağ Ev lideri kimləri günahlandırdı?

ABŞ Prezident Administrasiyası seçici məlumatlarının iddiaya görə ələ keçirildiyi ştatları xəbərdar edib və bu informasiyanın qorunması məqsədilə təcili addımlar atacağını açıqlayıb.

Ens.az Oxu.az-a istinadən xəbər verir ki,bu barədə Ağ Ev lideri Donald Tramp bəyan edib.

"Bu gün açıqladığım tamamilə yeni və təkzibolunmaz məlumatları nəzərə alaraq, mənim Administrasiyam seçki məlumatlarının Çin və başqaları tərəfindən ələ keçirilmiş ştatların məlumatlandırılması ilə məşğuldur. Zərəri minimuma endirmək üçün sıx əməkdaşlıq edəcəyik və həssas seçici məlumatlarının qorunması, onların heç vaxt satıla və ya sındırıla bilməməsi, həmçinin bir daha oğurlanmış seçkiləri görməməyimiz üçün operativ tədbirlər görürük", - deyə o, Ağ Evdə xalqa müraciətində deyib.

Amerika liderinin sözlərinə görə, bir çox ştatlarda seçki prosesi çox pis vəziyyətdədir və onun Administrasiyası bunu düzəltmək niyyətindədir.

"Biz, həmçinin aralıq seçkiyə qədər məlum texniki boşluqların aradan qaldırılması və köməklik göstərilməsi üçün bu ştatlar və yerli hakimiyyət orqanları ilə birlikdə işləməyə sadiqik", - deyə o əlavə edib.

ABŞ dövlət başçısı çıxışında, həmçinin Rusiyanın Amerika seçki prosesinə müdaxilə etməyə cəhd göstərən "Birləşmiş Ştatların rəqibləri" siyahısında olduğunu iddia edib. Trampın sözlərinə görə, Birləşmiş Ştatlar ölkədəki səsvermə sistemlərinin hücum riskinə son dərəcə məruz qaldığını sübut edən kəşfiyyat materiallarının məxfiliyini aradan qaldırır.

"Mövcud hesabatlardan birinə əsasən, hesab edirik ki, ABŞ-nin əleyhdarları, o cümlədən ən azı Rusiya, Çin, İran, KXDR və müxtəlif qeyri-dövlət qruplaşmaları seçki infrastrukturuna təsir göstərmək imkanına malikdirlər", - deyə o bildirib.

Ağ Ev lideri bundan başqa Birləşmiş Ştatların səsvermə sistemlərindəki zəifliklər haqqında məlumatların gizlədilməsində iştirak edən şəxslərin cəzalandırılması üçün aidiyyəti qurumlara xüsusi göstəriş verdiyini də bəyan edib.

"Bu gün mən ABŞ Milli Kəşfiyyat İdarəsinə, Ədliyyə Nazirliyinə, Federal Təhqiqat Bürosu və Mərkəzi Kəşfiyyat İdarəsinə (MKİ) bu cür mühüm məlumatların necə və nə üçün gizlədildiyini aydınlaşdırmaq, bu işdə əli olanları vəzifədən kənarlaşdırmaq, həmçinin zərurət yaranarsa, həmin şəxslərə qarşı cinayət işi açmaq məqsədilə təhqiqat aparmağı tapşırıram", - deyə o əlavə edib.

Donald Tramp xalqa müraciətində, həmçinin ABŞ kəşfiyyatının 2020-ci ildə Venesuelada ölkə rəhbəri Nikolas Maduronun hökuməti lehinə parlament seçkisinin nəticələrini saxtalaşdırmaq planını aşkar etdiyini iddia edib.

"Bu gün biz MKİ-nin Venesuelada Maduronun hökumətinə dəstək məqsədilə böyük miqdarda səs yaradılmasına dair konkret plan haqqında məlumatlar əldə etdiyini və onların bunu gerçəkləşdirdiyini göstərən sənədləri ictimaiyyətə təqdim edəcəyik. 2020-ci ildə öz seçkisini elektron yolla saxtalaşdırmaq üçün gizli razılaşma olub və onlar bunu ediblər", - deyə Tramp iyulun 16-da axşam saatlarında Ağ Evdən vətəndaşlara ünvanladığı televiziya müraciətində vurğulayıb.