Dövlət Komitəsinin nümayəndə heyəti Vaşinqtonda səfərdədir

Diasporla İş üzrə Dövlət Komitəsinin ABŞ-da olan nümayəndə heyəti Los Ancelesdən Vaşinqtona gəlib.

Komitədən Trend-ə verilən məlumata görə, nümayəndə heyətinin Vaşinqton görüşləri Azərbaycan səfirliyində ümummilli lider Heydər Əliyevin büstü önünə gül dəstəsinin qoyulması ilə başlayıb.

Daha sonra ABŞ Dövlət Departamentində Siyasət və Qiymətləndirmə direktoru Stefen Guice ilə görüş keçirilib. Görüşdə soydaşlarımızın inteqrasiyası, Azərbaycan dili və mədəniyyətinin təbliği proqramlarının təşkili, soydaşlarımıza təhsil və peşə qabiliyyətinin artırılması imkanlarının yaradılması, uğur qazanmış amerikalı azərbaycanlılara Dövlət Departamenti tərəfindən xüsusi dəstək göstərilməsi və soydaşlarımızın sahibkarlıq imkanlarının təşviqi məqsədilə Diasporla İş üzrə Dövlət Komitəsi ilə əməkdaşlığın qurulması perspektivləri müzakirə edilib.

Nümayəndə heyətinin növbəti görüşü Dünya Bankının binasında Dünya Bankı, Beynəlxalq Valyuta Fondu və Beynəlxalq Maliyyə Korporasiyasında çalışan azərbaycanlıların assosiasiyasında baş tutub.

Görüş zamanı ilkin tanışlıqdan sonra burada çalışan və təcrübə keçən azərbaycanlıların sayının artırılması, azərbaycanlı gənclərin bu qurumlarda karyera qurmaları üçün ölkəmizdə və xaricdə sistemli seminarların təşkili, qurumun xarici əməkdaşları arasında ölkəmizin təbliğ edilməsi və milli-mədəni irsimizin tanıdılması üçün bir sıra təkliflər müzakirə edilib.

Dövlət Komitəsinin nümayəndə heyəti daha bir görüşü Türkiyənin Vaşinqtondakı səfiri Serdar Kılıcla keçirib. Görüş zamanı bütün dünyada iki qardaş ölkənin xalqları və dövlətləri arasında qüvvələrin briləşdirilməsi, bu istiqamətdə konkret və strateji planın qurulması müzakirə edilib. Hər iki xalqın ABŞ-da fəaliyyət göstərən icmalarının bundan sonra daha da sıx və davamlı işləməsi qərara alınıb.

Keçirilən görüşlərdə Azərbaycanın ABŞ-dakı səfiri Elin Süleymanov da iştirak edib.