Fəzail Ağamalı: “Bununla bağlı qanunun hazırlanmasına ehtiyac var”

"Ötən ilin ən mühüm və uğurlu hadisəsi Prezident İlham Əliyevin yenidən xalqın etimadını qazanaraq dövlət başçısı seçilməsi oldu. 2018-ci il Azərbaycanın idarəçilik sistemində uğurlu il olub".

Publika.az xəbər verir ki, bu fikirləri deputat Fəzail Ağamalı Milli Məclisin plenar iclasında hökumətin hesabatı müzakirə olunarkən deyib.
Deputat bildirib ki, büdcənin formalaşmasında həlledici rol oynayan dərin islahatların 2018-ci ildə davam etdirilməsi nəticəsində şəffaflıq təmin olunub: “Bu, sahibkarlar arasında da inam mühiti yaratdı. Kənd təsərrüfatına innovativ yanaşma aqrar sektorla məşğul olanlarda fəallığa səbəb oldu. Maliyyə sabitliyi təmin olundu”.

Meşə təsərrüfatının qorunması ilə bağlı atılan addımların təqdirəlayiq olduğunu deyən F.Ağamalı bu addımların davam edəcəyinə inandığını dilə gətirib: “Təhsil, səhiyyə, məcburi köçkünlərə diqqətin artırılması sosial sahədə görülən işlərə daxildir. Azərbaycanın dəmiryolu infrastrukturu ilə görülən işlər ölkəmizə iqtisadi dividentlər gətirməkdədir. Bank sisteminin sağlamlaşdırılması istiqamətində atılan addımlar da mühümdür”.

F.Ağamalı qeyd edib ki, Azərbaycanda torpaq fondunun 47 faizi şoranlaşmış vəziyyətdədir: “Bununla bağlı qanunun hazırlanmasına ehtiyac var”.