Gəncə Dövlət Kamera Orkestrinin bayram konserti musiqisevərlər üçün sənət hadisəsinə çevrilib

Gəncə Dövlət Kamera Orkestrı Fikrət Əmirov adına Gəncə Dövlət Filarmoniyasının böyük səhnəsində konsert proqramı ilə çıxış edib.

AZƏRTAC-ın bölgə müxbiri xəbər verir ki, Gəncə Şəhər İcra Hakimiyyətinin dəstəyi ilə reallaşan konsert 31 Dekabr – Dünya Azərbaycanlılarının Həmrəylik Günü və Yeni il münasibətilə təşkil olunub.

Bütün sənətsevərləri qarşıdan gələn bayramlar münasibətilə təbrik edən Kamera Orkestrının bədii rəhbəri, Xalq artisti Rafael Bayramov bildirib ki, mədəniyyət işçiləri hər zaman dövlət qayğısını hiss edirlər. Gəncədə inşa olunan möhtəşəm filarmoniya binası, yaradılan bu şərait də Azərbaycan musiqisinin inkişafına göstərilən diqqət və qayğının bariz nümunəsidir.

Sonra Xalq artisti Rafael Bayramovun dirijorluğu ilə çıxış edən orkestr klassik musiqi çələngi ilə tamaşaçıları musiqinin sehrinə salıb. Xalq artisti Sevinc İbrahimova, Əməkdar artistlər Zərinə Allahverdiyeva, Kəmalə Tağızadə, Əməkdar mədəniyyət işçisiləri Mehparə Cəfərova, Elmir Pişnamazzadə və digər müğənnilərin ifasında yerli və xarici bəstəkarların əsərləri səsləndirilib. “Sən yadıma düşəndə”, “Sənə də qalmaz”, “Balladios”, “Prelyudia” kimi ifalar tamaşaçılar tərəfindən alqışlarla qarşılayıb.

Konsert proqramına Müslüm Maqomayevin “Azərbaycan” mahnısı ilə yekun vurulub.