“HEYDƏR ƏLİYEV” informasiya blokuna Mərkəzi Elmi Kitabxananın töhvəsi

Bugün Azərbaycan xalqının ümumilli lideri Heydər Əliyevin anım günüdür. Ulu öndərin  vəfatından 15 il keçir.

            Heydər Əliyevin geniş ictimai-siyasi və eləcə də elmi-nəzəri irsinin dərindən öyrənilməsi maddi-mənəvi sərvətlərin toplayıcısı və qoruyucusu olan kitabxanaların qarşısında duran ən vacib vəzifələrdəndir. Ulu öndərin milli örnək hesab olunan irsinin geniş oxucu kütləsi arasında təbliği işində AMEA-nın Mərkəzi Elmi Kitabxanasının (MEK) da xidmətləri var.

            MEK-də Heydər Əliyevin irsinə dair ümumilikdə 1000-dən çox sənəd mühafizə olunur və oxucuların istifadəsinə verilib.  Bunlardan 954 sənəd MEK-in müasir formatlı e-kataloquna, 450 adda sənəd isə MEK-in rəqəmsal bazasına daxil edilib.

            Kitabxananın Sərgi salonu və Akademiklər zalında görkəmli siyasi xadim Heydər Əliyevin həyat və yaradıcılığını əks etdirən, eləcə də özünün müəllifi olduğu sənədlər daimi güşələrdə təqdim olunur. Sərgilər Heydər Əliyevin anadan olmasını 95 illiyi münasibəti ilə yeni daxil olan kitablarla zənginləşdirilib.

            MEK-də ümummilli lider Heydər Əliyevin anım günü və anadan olması münasibətilə məlumatlandırıcı və informasiya bələdçisi xarakterli tədbirlər həyata keçirir.

            Azərbaycan xalqının ümmumilli lideri Heydər Əliyevin anadan omasının  95 illiyi münasibətilə aprel ayında keçirilmiş akademiyanın gənc alimləri üçün AMEA-nın Rəyasət Heyəti və Azərbaycan Həmkarlar İttifaqları Konfederasiyasının birgə müsabiqəsində MEK-də iştirak edib və müsabiqə üçün “Heydər Əliyev: elektron baza və sənədlərin reyestri” adlı elektron resurs hazırlanıb. Bu elektron resursa ümumilli liderin kitabxanada mühafizə olunan kitablarının elektron məlumat bazası, MEK-in hazırladığı video-film, sadələşdirilmiş siyahı və sənədlərin reyestri daxil edilib.

            MEK tərəfindən Azərbaycana aid informasiyanı idarə oluna bilən və əlaqələndirilə bilən strateji resursa çevirmək və informasiya müharibəsində üstünlük qazandıra bilən təsirli silah formalaşdırılması ehtiyaclarını qarşılaya bilən Milli Rəqəmsal Yaddaş layihəsi yaradılıb. Layihənin qarşısına Azərbaycanın qədim mədəniyyəti, tarixi, coğrafiyası və s. bəşəriyyətin inkişafına qoyduğu intellektual yatırımlar barədə mövcud olan məlumatları toplayıb sistemləşdirmək, rəqəmsallaşdırmaq, arxivləşdirmək, elektron kataloq vasitəsilə axtarışları asanlaşdırmaq, Azərbaycan və dünya oxucusunun, elmi tədqiatçıların, siyasətçilərin, diplomatların, diaspor nümayəndələrinin istifadəsinə vermək və milli yaddaşımıza aid olan məlumatları etibarlı şəkildə qoruyub növbəti nəsillərə ötürmək kimi vəzifələr qoyulub. Məhz bunları nəzərə alaraq, MEK-in MRY bazasına ilk olaraq görkəmli siyasi xadim Heydər Əliyevə həsr olunmuş, eləcə də özünün müəllifi olduğu sənədlər daxil edilib.

            Bundan başqa, MEK-in tərkibində fəaliyyət göstərən Sərbəst elektron resurlarla iş bölməsi Vikipediya onlayn bazasına “91-lər” adlı məqalə yerləşdirib. Məqalə 1992-ci ildə Naxçıvan Ali Məclisinin sədri  Heydər Əliyevin  hakimiyyətə qayıdışı üçün açıq və fəal mübarizəyə səsləyən müraciətə imza atmış, Yeni Azərbaycan Partiyasının “qızıl fondu” elan olunmuş 91 nəfər tanınmış ziyalı haqqındadır.

            Qeyd edək ki, MEK-in Beynəlxalq və ictimaiyyətlə əlaqələr şöbəsi Heydər Əliyevin 95 illik yubileyi münasibətilə “Heydər Əliyev 95 illik” başlığı altında mütəmadi paylaşımlar edir. Bu paylaşımları kitabxananın rəsmi saytı olan mek.az saytında və qeydiyyatda olduğu bütün sosial şəbəkələrdə tanış ola bilərsiniz.

            AMEA Mərkəzi Elmi Kitabxana
            Beynəlxalq və ictimaiyyətlə əlaqələr şöbəsi