İkinci 1 trilyon dollarlıq şirkət yoldadır

Dünyanın ən böyük onlayn pərakəndə şirkəti olan Amazon-un səhmi bahalaşmaqda davam edir. Dünən şirkətin səhminin qiyməti 2 min dollarla yeni bir səviyyəni də keçib. "Marja" xəbər verir ki, bu artımla Amazon-un bazar dəyəri 988 milyard dollar olub və 1 trilyon dollara yaxınlaşıb.

Amazon-un qurucusu Cef Bezos dünyanın varlı adamıdır.  
Amazon-un bir səhminin qiyməti dünən ən yüksək 2025 dolları görəndən sonra günü 2002 dollardan tamamlayıb. Beləliklə, son bir ildəki qiymət artımı 71%-ə çatıb.
Birjalarda "öküz" bazarının başladığı 2009-cu ilin Mart ayından bu yana Amazon-un səhminin bahalaşması 3 min faizi keçib. Başqa bir ifadə ilə, 9.5 il əvvəl Amazon səhmi alan investorlar 31 qat pul qazanıb.

Analitiklərə görə, Amazon-un səhmlərinin bahalaşmasının ən mühüm səbəbi şirkətin fəaliyyət sahələrini şaxələndirməsidir. Ötən il "Whole Foods" marketi 13.7 milyard dollara satın alaraq təzə meyvə-tərəvəz işinə daxil olan Amazon, iyun ayında da onlayn aptek "Pillpack"i alaraq əczaçılıq işinə addım atmışdır.
Amazon-un səhminin qiymətinin yaxın gələcəkdə 2500 dollara qalxacağı gözlənilir. Bu halda şirkətin bazar dəyəri də 1.2 trilyon dollara yüksələcəkdir.
 
İLKİ APPLE OLMUŞDU
Amazon 1 trilyon dollarlıq səviyyəyə yanaşan tarixdəki ikinci şirkətdir. Bu səddi keçən ilk şirkət isə 2 Avqustda  Apple olmuşdu. Apple-ın səhmləri 201,50 dollarlıq səhm qiymətilə birja tarixində bir ilkə imza atmışdı.
 

Apple dünən isə 225 dollarlıq səhm qiymətilə bazar dəyərini 1.07 trilyon dollara çatdırmağı bacarıb.