İstanbul boğazında delfinlər göründü
Türkiyədə insanların koronavirusa görə evlərinə qapandığı bir dövrdə İstanbul boğazında üzən delfinlərin görüntüləri diqqət çəkib.
“Qafqazinfo” “TRT Haber”ə istinadən xəbər verir ki, bu görüntülər İstanbulun Qalata Körpüsü yaxınlığında lentə alınıb.
Boğazda delfinlərin görünməsinə səbəb kimi pandemiya dövründə insan fəaliyyətinin azalması olduğuna dair bir çox fikirlər səsləndirilib. Ancaq İstanbul Universiteti Hidrologiya Fakültəsinin professoru Dr. Arda Tonay İstanbul boğazında hər zaman delfinlərin olduğunu və yazda onların tez-tez göründüyünü bildirib. Onun sözlərinə görə, boğazda canlıların aktivliyinin artdığına dair dəqiq nəticələrə gəlmək üçün mütamədi müşahidələrə ehtiyac var.
Qeyd edək ki, Türkiyədə koronavirusa yoluxanların sayı 69,392-yə çatıb, 1,518 nəfər xəstəlik səbəbindən həyatını itirib.
Şərhlər
Şərhləri göstər Şərhləri gizlət