KİV: ABŞ aviadaşıyıcısının bir neçə hərbçisi özünü dənizə atmağa cəhd edib

ABŞ-nin "USS Abraham Lincoln" aviadaşıyıcısının göyərtəsində bir neçə hərbçi intihara cəhd edib.

Oxu.Az "Military Times" qəzetinə istinadən xəbər verir ki, təyyarədaşıyan gəmi nəzərdə tutulan altı ay əvəzinə səkkiz aydan artıqdır xidmətdədir və şəxsi heyət evə nə vaxt qayıda biləcəyini bilmir.

Qəzetin məlumatına görə, göyərtəsində 5 000 dənizçinin olduğu "USS Abraham Lincoln" noyabrın ikinci yarısında hərbi xidmətə başlayıb. Gəminin vəzifələrinə ABŞ-nin Yaxın Şərqdəki hərbi əməliyyatlarını dəstəkləmək daxildir. Missiyanın may ayında başa çatacağı gözlənilirdi, lakin hərbçilərin evə qayıdış tarixi hələ də müəyyən edilməyib.

Döyüş gəmisində xidmət edən hərbçilərin yaxınlarının sözlərinə görə, bir neçə nəfər xidmət zamanı özünü dənizə atmağa cəhd edib. Dənizçilərin emosional vəziyyətinin pisləşməsinin səbəbləri arasında həddindən artıq iş yükü, tükənmə və depressiv vəziyyət göstərilir.

ABŞ Hərbi Dəniz Qüvvələri bildirib ki, aviadaşıyıcının rəhbərliyi hərbçilərin psixoloji vəziyyətini daim izləyir və onlara müvafiq psixoloji və tibbi yardım göstərməyə hazırdır.

Qurum missiya zamanı intihara və ya özünə qəsdən xəsarət yetirməyə cəhd edən hərbçilərin dəqiq sayını açıqlamaqdan imtina edib.