![MDB-də birinci yerdəyik - Nazir](https://ens.az/images/news/45c564f5285bb8e3552d3cf0dd75567e.jpg)
MDB-də birinci yerdəyik - Nazir
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) 2020-ci il üçün büdcəsinin gəlir və xərcləri açıqlanıb.
Axar.az xəbər verir ki, bu barədə nazir Sahil Babayev parlamentdə çıxışı zamanı bildirib.
Nazir bildirib ki, “Sosial təminat və müdafiəni həyata keçirən müvafiq icra hakimiyyəti orqanının 2020-ci il büdcəsi haqqında" Qanun layihəsində DSMF-nin gələn il üçün gəlir və xərcləri 4 825 508 800 manat səviyyəsində nəzərdə tutulub.
Qanun layihəsinə əsasən, 2020-ci ildə DSMF-nin məcburi dövlət sosial sığorta haqları üzrə daxilolmaları 3 392 594 770 manat, büdcədən maliyyələşən təşkilatlar üzrə 1 238 683 400 manat, büdcədən maliyyələşən təşkilatlarda işləyənlər üzrə 168 911 370, qeyri-büdcə sektoru üzrə 1 985 000 000 manat, o cümlədən sahibkarlıq fəaliyyəti ilə məşğul olan fiziki şəxslər üzrə 80 000 000, sair gəlirlər 6 000 000 manat nəzərdə tutulub.
Sənəddə gələn il üçün dövlət büdcəsindən ayırmalar, yəni transferlərin proqnozu 1 426 914 030 manat götürülüb. Fondun 2020-ci il büdcəsinin xərcləri əhaliyə ödənişlər üzrə 4 684 678 800 manat, o cümlədən əmək pensiyalarının ödənilməsi üzrə 4 570 078 800 manat, məcburi dövlət sosial sığorta haqları hesabına müavinətlərə 114 600 000 manat, əmək qabiliyyətinin müvəqqəti itirilməsinə görə 28 000 000, hamiləliyə və doğuşa görə 34 000 000, uşağın anadan olmasına görə 14 900 000 manat, 3 yaşına çatanadək uşaqlara qulluqla əlaqədar 14 500 000 manat, dəfn üçün 23 200 000 manat, pensiya və müavinətlərin əhaliyə çatdırılması, bank əməliyyatlarının aparılması üzrə xidmət haqqı xərcləri 33 900 000 manat proqnozlaşdırılıb.
Nazir əlavə edib ki, 2019-cu ildə iki böyük sosial paket həyata keçirilib və bu 4,2 milyon insanı əhatə edib:
“Cari ildə minimum əmək haqları 93 faiz, tələbələrin təqaüdləri 20 faiz artırılıb. Hazırda bizdə minimum əmək haqqı və pensiyalar MDB-də alıcılıq qabiliyyətinə görə birinci yerdədir”.
Şərhlər
Şərhləri göstər Şərhləri gizlət