MEK-ə MEK-ə professor Zümrüd Dadaşzadənin kitabları təqdim olunub

Azərbaycan Milli Elmlər Akademiyası Mərkəzi Elmi Kitabxanasına (MEK) Əməkdar incəsənət xadimi, Bakı Musiqi Akademiyasının professoru Zümrüd Dadaşzadə tərəfindən müəllifi olduğu “Ədilə Hüseynzadə”, “Azərbaycan simfoniyası” və “Elnarə Dadaşova” adlı kitablar təqdim olunub.

“Ədilə Hüseynzadə” adlı kitabda peşəkar bəstəkar və görkəmli pedaqoq, Azərbaycanın ilk qadın bəstəkarlarından biri, Əməkdar incəsənət xadimi Ədilə Hüseynzadənin zəngin həyat və yaradıcılıq yolu işıqlandırılıb və sənətkarın Azərbaycan musiqisi tarixində tutduğu şərəfli yerə, musiqi üslubunun özünəməxsus cəhətlərinin tədqiqinə xüsusi diqqət yetirilib.

“Azərbaycan simfoniyası” adlı kitabda 1960-80-ci illər Azərbaycan simfoniyasının başlıca inkişaf istiqamətlərindən bəhs olunur. Kitabda ilk növbədə silsilə, janr və formaca orjinal əsərlər təhlil olunur, muğam və simfonizmin qarşılıqlı münasibətlərinin yeni mərhələsi üçün səciyyəvi cəhətlər aşkarlanır, simfoniyaya müasir teatr, kino dramaturgiyası və leksikasının təsirindən söz açılır.

“Elnarə Dadaşova” adlı kitabında isə müəllif bəstəkar Elnarə Dadaşovanın bəstələdiyi əsərlərini şərhləndirir.

Bu kitablarla yanaşı Z.Dadaşzadənin atası, görkəmli ədəbiyyatşünas alim Araz Dadaşzadənin kitabı da MEK-ə təqdim olunub. Kitabda Araz Dadaşzadənin “XVIII əsr Azərbaycan lirikası” monoqrafiyası verilib. Monoqrafiyada poetik ədəbi irsimizin mühüm hissəsini təşkil edən lirikanın inkişaf qanunauyğunluqları, məzmununun rəngarəngliyi, forma xüsusiyyətləri, ədəbi metod məsələsi araşdırılıb, həmin dövr poeziyamızın orta əsrlər ədəbi prosesində yeri və əhəmiyyəti müəyyənləşdirilib. Kitabda həmçinin A.Dadaşzadənin müxtəlif illərdə dövri mətbuatda nəşr edilən məqalələri də yer alır.