Millət vəkillərindən təklif: Hesablama Palatasının səlahiyyətləri artırılsın

Oxu.Az-ın xəbərinə görə, illik hesabatla çıxış edən Hesablama Palatasının sədri Vüqar Gülməmmədov deyib ki, hesabat ilində Palata tərəfindən 59 nəzarət tədbiri, 53 audit təbdiri həyata keçirilib.

Onun sözlərinə görə, 53 audit tədbirindən üçü “Dövlət sirri haqında” qanuna əsasən məxfi qaydada aparılıb və nəticələr hüquq-mühafizə orqanlarına göndərilib:

“Beş tədbir isə Dövlət Sosial Müdafiə Fondunda aparılıb”.

Daha sonra hesabatın müzakirəsi başlayıb.

Millət vəkilləri müzakirələrə qoşularaq nöqsanlardan danışıb, bəziləri Hesablama Palatasının fəaliyyətinin genişləndirilməsi təklifi ilə çıxış edib.

Ümumi müzakirələr fonunda sözügedən qurumun səlahiyyətlərinin artırılması təklif olunub.

İqtisadi siyasət, sənaye və sahibkarlıq komitəsinin sədri Ziyad Səmədzadə qeyd edib ki, mühasibat uçotunun gücləndirilməsi ilə bağlı Hesablama Palatasının bir sıra təklifləri var.

“Çünki mühasibat uçotun aparalmasında hələ də nöqsanlar və problemlər yaşanmaqdadır. Bir sıra qurumlarda hələ də bu işlər lazımınca həyata keçirilmir. Odur ki, Palata mühasibat uçotunun aparılması ilə bağlı öz təkliflərini verib”.

Millət vəkili Fəzail Ağamalı isə hələ də dövlət büdcəsinin mənimsənilməsi hallarının qalmasından və mövcudluğundan narazılığını ifadə edib:

“Hesablama Palatası öz işini elə yüksək səviyyədə qurmalıdır ki, büdcədən maliyyələşən qurumlar tərəfindən büdcə vəsaitinin dağıdılmasına, mənimsənilməsinə imkan verilməsin”. 

O bildirib ki, bu məsələ MM səviyyəsində illərdir müzakirə olunur və rəqəmlər söylənilir:

“Hesablama Palatası öz işini yüksək qurmaqla yanaşı, müstəqilliyini də təmin etməlidir. 

Elə etməlidir ki, bu və ya digər qurumların, şəxslərin təsiri olmasın. Bundan əlavə, biz ölkədə kimsə vəzifədən çıxandan sonra onların var-dövləti haqqında məlumatları eşidirik, bu barədə məlumatlar mətbuatda yayılır. 

Ancaq Hesablama Palatası bunları zamanında aşkarlamalıdır. Bu vəsaitlərin qaytarılması ilə iş bitməli deyil, büdcəni mənimsəyənlər Azərbaycan qanunları qarşısında ciddi cavab verməlidirlər”.

Deputat Əflatun Amaşov maliyyə nəzarəti məsələsinə diqqət çəkib. Bildirib ki, Azərbaycanda artıq maliyyə şokları yaşanmamalıdır.

“Bilirsiniz ki, bir müddət öncə, “Beynəlxalq Bank” məsələsində bunun şahidi olduq”, - deyən Ə.Amaşov qeyd edib ki, bir sıra hallarda Hesablama Palatasının təklifləri aidiyyəti qurumlar tərəfindən nəzərə alınmır.

“Büdcədən vəsait mənimsənilirsə, bu, cinayətdir. Ancaq buna “yumşaq” ad qoymaqla, cinayətdən imtina etməyə başlayırıq”. 

Bu sözləri isə deputat Fazil Mustafa deyib. 

“Vergi ödəyiciləri, borcların ödənilməsi, satınalmalarla bağlı ciddi problemlər var”, - deyən millət vəkili bildirib ki, xüsusilə dövlət satınalmalarında ziddiyyətlər qabarıq şəkildə özünü göstərir:

“Hesabata əsasən, 76 tender komissiyasının qanunvericiliyin tələbələrinə uyğun şəkildə fəaliyyəti araşdırılıb. Lakin hansı tenderin ləğvi ilə bağlı məlumat əldə etmək mümkün deyil. 
Bütün bunları araşdırdıqda görürük ki, Hesablama Palatasının təsir imkanları böyük olsa da, reallıq baxımından çox yerlərə təsir etmək imkanı yoxdur. 

Hesablama Palatasının bu problemlərin aradan qaldırılmasında öncüllüyünü təmin etməsək, gələcəkdə bu problemlərin qarşısını almaq çətin olacaq. İslahatlar aparmaq niyyətimiz ardıcıldırsa, Hesablama Palatasının rəyi ilə bunları aradan qaldırmaq olar”.

Millət vəkili Siyavuş Novruzov da Hesablama Palatasının fəaliyyətinə toxunaraq, bu qurumun bəzi hallarda imkanlarından yüksək fəaliyyət ortaya qoyduğunu nəzərə çatdırıb:

“Biz köhnə sistemdən çıxıb yeni sistemə daxil olmalıyıq. Dövlət başçısı struktur islahatları aparır. “Hesablama Palatası haqqında” qanuna dəyişiklik edilməklə qurumun strukturunu islahatlara uyğun formalaşdırmalıyıq”.

“Bəzi hallarda dövlət qurumlarında vəsait mənimsənilir, vəsaiti mənimsəyən cəza çəkməyə razı olur, nəinki vəsaiti qaytarmağa. Təklif edirəm ki, yoxlamalar mütəmadi aparılsın, bu, illik, hətta altı aylıq ola bilər”, - deyən komitə sədri qeyd edib ki, lazım olduğu təqdirdə bura əlavə kadrlar cəlb olunmalıdır.

Onun sözlərinə görə, korrupsiyaya meyillənənlərin qarşısı alınmalıdır. 

“Buna görə Hesablama Palatasına dəstək verilməlidir ki, fəaliyyətini daha da yüksək səviyyədə həyata keçirsin”, - deyə S.Novruzov əlavə edib.

Kamil Həmzəoğlu