Mirzoyan: "TRIPP layihəsi Azərbaycanla sülh müqaviləsindən əvvəl icra oluna bilər"

"TRIPP (Beynəlxalq Sülh və Rifah naminə Tramp Marşrutu) layihəsinin icrasına Ermənistan və Azərbaycan arasında sülh müqaviləsi imzalanmazdan əvvəl başlanıla bilər".

Oxu.Az Ermənistan mediasına istinadən xəbər verir ki, bunu Ermənistanın xarici işlər naziri Ararat Mirzoyan parlamentdəki çıxışı zamanı bildirib.

Mirzoyan sülh müqaviləsinin mətninin artıq paraflandığını və hər iki dövlətin sənədin məzmununu şübhə altına almadığını rəsmən bəyan etdiklərini xatırladıb.

Nazirin sözlərinə görə, imzalanmış rəsmi sazişin olmamasına baxmayaraq, reallıqda Ermənistanla Azərbaycan arasında artıq faktiki sülh bərqərar olub:

"Nəticə etibarilə, TRIPP layihəsinin işə salınması üçün sülh lazımdır və o da artıq mövcuddur".

Xarici işlər naziri əvvəlcə sülh müqaviləsinin imzalanması, ardınca isə birgə layihələrin həyata keçirilməsi ardıcıllığının daha məntiqli görünə biləcəyini etiraf edib. Lakin onun qənaətinə görə, təcrübədə proseslər heç də həmişə bu ssenari üzrə inkişaf etmir.

Mirzoyan həmçinin TRIPP və digər birgə təşəbbüslərin reallaşdırılmasının özlüyündə Ermənistanla Azərbaycan arasında sülh müqaviləsinin imzalanması prosesinə təkan verə biləcəyini də istisna etməyib.