Neyroşəbəkə bir neçə saniyəyə insanın 3d modelini yaradır

Özünü video oyuna keçirmək daha da asanlaşır. Alman alimlərinin yeni texnologiyası virtual məkan üçün 3d model yaratmağa imkan verir. Adətən bunun üçün xüsusi avadanlıq və insanın müxtəlif bucaqlar altında çəkilişi üçün çoxlu kamera tələb olunur. Yeni alqoritm bir rakursdan çəkilişin standart video materialından istifadə edərək 3d model yaradır.

Proses üçn mərhələdən ibarətdir. Əvvəlcə sistem insanın hərəkət etdiyi (360° çevrilir) videonun bir neçə saniyəsini analiz edir. Proqram bədənin üçölçülü formasını və oynaqların yerini təxminən qiymətləndirir. İkinci mərhələdə o hər kadrdan yaradılmış virtual insanı çəkir və bütün informasiyanı bir dəqiq modeldə birləşdirir. Üçüncü mərhələdə alqoritm modelə rəng və teksturanı tətbiq edir.

Tədqiqatçılar müxtəlif bədən quruluşlu, müxtəlif geyimli insanlarla və müxtəlif fonlarla metodları sınaqdan keçirib. 3D modellər 5 millimetrə qədər dəqiqliklə orijinalla üst-üstə düşür.  Çəki, geyim və modelin pozasını dəyişmək olar. Mühəndislər hələlik ətək ilə və uzun saçlarla bağlı çətinlikləri aradan qaldırırlar, amma layihə nəhayət iyunda Solt Leyk Sitidə keçiriləcək konfransda təqdim olunacaq.

Tərcümə: Famil Ələkbərov

Mənbə: Naukatv