Nyu Yorkda cərrah işləyən yəhudi həmyerlimiz

Siyasi baxışlar müxtəlif ola bilər, amma Allah bu xalqdan heç nəyi əsirgəməyib. İti zəka, dərin təfəkkür, uzaqgörənlik, müdriklik, mütəşəkkillik bu xalqın alın yazısıdır. Zarafat deyil, yüz iyirmi dörd min peyğəmbərin böyük əksəriyyəti bu xalqın övladı olub. Zaman-zaman çətinliklərlə üzləşsələr də tükənməyiblər, vardırlar, var olacaqlar da. Söhbət Yəhudi xalqından gedir. Bu gün dünyaya səpələnən yəhudilərin arasında bizə doğma olan insanlar da vardır. Nə vaxtsa Azərbaycana pənah gətirən və əsrlər boyu bizimlə eyni cəmiyyətdə mehriban yaşayan dağ yəhudiləri. Azərbaycan xalqının vəfalı, etibarlı dostları. Bu gün sizə onlardan biri, həkim-cərrah Vadim Naxamiyayevdən danışmaq istəyirəm.
O, 1966-cı ildə Xaçmazda dünyaya gəlib. 1983-cü ildə orta təhsilini bu rayonda başa vurub. 1983-1989-cu illərdə Azərbaycan Tibb Universitetində ali təhsil alıb və bir il internatura keçərək cərrah ixtisasına yiyələnib. 1990-1991-ci illərdə Xaçmaz rayon Mərkəzi Xəstəxanasında cərrah işləyib. Sonra beş il Mədə-Bağırsaq Cərrahiyəsi elmi tədqiqat institutunda kiçik elmi işçi vəzifəsində çalışıb. Və 1996-cı ildə burada tibb elmləri namizədi alimlik dərəcəsinə layiq görülüb. 1996-1998-ci illərdə Xaçmazda təsərrüfat hesablı cərrahiyə şöbəsi açaraq orada işləyib. 1998-2003-cü illərdə Moskva Dövlət İ.M. Seçenov adina Tibb Universitetinin Cərrahiyə şöbəsində cərrah və böyük elmi işçi vəzifəsində çalışıb. Eyni zamanda Moskva Təcili Tibbi Cərrahiyə Xəstəxanasının cərrahı olub. 
2003-cü ildən ABŞ-ın Nyu York şəhərində yaşayır…

…Atası Roman kişi Xaçmaz rayonunun Yeyinti Sənayesi İdarəsində müdir vəzifəsinədək yüksələ bilib. Təqaüdə çıxdıqdan sonra restoran açaraq bu iaşə obyektinə rəhbərlik edib. Anası Cəvahir xanım evdar qadındır. Hər ikisi hazırda Nyu Yorkun Bruklin hissəsində yaşayır…

Vadim Amerikaya gələndən sonra "USNLE" imtahanlarını verərək altı il rezedentura keçib. Sonra "BOARDs" imtahanlarından uğurla çıxaraq tibb üzrə mütəxəsis adını alıb. Hazırda Nyu York "Presbyterian Weill Cornell University"-nin Methodist Hospitalının cərrahiyə şöbəsində həm cərrahiyəni tədris edir və həm də cərrah işləyir…

Deyir ki,- "Mənim sözüm gənc həkimlərədir. Burada səhiyyə çox yüksək səviyyədədir. Öyrənməli şeylər çoxdur. Özünə güvənənlər biliklərini artırmaq istəyirlərsə çəkinməsinlər, buyurub gələ bilərlər. Hətta öz sahəm üzrə gələnlər olsa kömək etməyə hazıram"…

…Ömür-gün yoldaşı Beata Aqarunova evdar xanımdır. İki oğlu vardır. Böyük oğlu Efti 23, ikinci oğlu Roma isə 20 yaşındadırlar. Hər ikisi də kollecdə təhsil alır...

Üzgüçülüyü, velosiped sürməyi xoşlayır. Fantastik əsərləri, rus klassiklərini, Azərbaycanın tarixi ilə bağlı kitabları sevə-sevə mütaliə edir. Arzulayır ki, Azərbaycanda həmişə əmin-amanlıq hökm sürsün. İstəyir ki, ölkəmizdə səhiyyə xidməti dünya standartlarına uyğun olsun. İmkanından asılı olmayaraq hər bir vətəndaş yüksək tibbi xidmətdən istifadə edə bilsin…

Sevindirici haldır ki, harada yaşadıqlarından asılı olmayaraq ölkəmizdən pərvazlanan yəhudilər ürəklərində xalqımıza ehtiram, vətənimizə isə sevgi bəsləyirlər. 
Bəli, bu sevgi onların davranışlarında, eləcə də azərbaycan dilini unutmamaqlarında öz əksini tapıb…

Müəllif: Elman Eldaroğlu,
ABŞ, Miçiqan