Pakistandan Məkkəyə hücuma görə xəbərdarlıq: Türkiyənin də daxil olduğu saziş müqəddəs şəhəri necə qoruyacaq?

Pakistanın müdafiə naziri Xavaca Asif, Yəməndəki İran tərəfindən dəstəklənən husilərin hücumları fonunda vəziyyətin Məkkə Ortaq Müdafiə Anlaşmasının tətbiq edilməli olduğu bir həddə çatdığına inandığını bildirib.

Oxu.Az "Haber Global"a istinadən xəbər verir ki, gündəmdəki məsələləri şərh edən nazir, husilərin İslamın müqəddəs şəhəri Məkkəyə dronla hücum cəhdindən sonra Məkkə Ortaq Müdafiə Anlaşmasının işə salınmasının vacibliyini qeyd edib.

"Məkkə Anlaşması bizim üçün də qüvvədədir və öz vəzifəmizi icra edəcəyik", - deyə vurğulayıb.

Müqəddəs məkanları qorumaq üçün Pakistanın hər hansı bir razılaşmaya ehtiyacı olmadığını deyən nazir, bu yerlərin mühafizəsinin onsuz da mənəvi bir borc olduğunu diqqətə çatdırıb. Nazir bildirib ki, Məkkə Ortaq Müdafiə Anlaşması üç ölkədən hər hansı birinin ərazi bütövlüyü və ya coğrafi sərhədləri pozulduğu təqdirdə qarşılıqlı müdafiəni nəzərdə tutur və bunun icrası ilə bağlı heç bir qeyri-müəyyənlik yoxdur. Pakistanın hərbi strategiyasının detallarını ictimaiyyətə açıqlamayacağını söyləyən Asif, İslamabadın sənədə sadiq qaldığını və bütün öhdəliklərini yerinə yetirəcəyini bir daha təsdiqləyib.

Husilərin Səudiyyə Ərəbistanına hücumları ilə bağlı yaranan narahatlıqlar barədə sualı cavablandıran nazir, Pakistanın Ər-Riyadın mesajını İrana çatdırdığını qeyd edib. İranın dövlət səviyyəsində bölgədə yeni bir cəbhə açacaq şəkildə husi qruplaşmalarını dəstəkləyəcəyinə inanmadığını deyən Asif, Tehranın onsuz da hazırda münaqişənin içində olduğunu xatırladıb. O, bu cür qruplaşmaların dövlətlərdən rəsmi icazə və ya dəstək almadan da hərəkət edə biləcəyini vurğulayıb. İranın yeni cəbhə açma ehtimalının çox az olduğunu və vəziyyətin daha da gərginləşməsinin qarşısının alınmasının vacibliyini deyən Asif, Pakistanın münaqişənin başqa ərazilərə yayılmaması üçün səylərini davam etdirəcəyini bildirib.