Qadınların əksəriyyəti ayaq ölçüsünə uyğun olmayan ayaqqabı geyinir

Avstraliyada aparılan yeni araşdırma qadınların böyük hissəsinin ayaq uzunluğuna əsasən müəyyən edilən standartdan fərqli ölçüdə ayaqqabı geyindiyini göstərib. Tədqiqatçılar bunun əsas səbəblərindən birinin ayaqqabı ölçülərinin ayağın enini və formasını kifayət qədər nəzərə almaması olduğunu bildirirlər.

Avstraliyanın RMIT Universitetində aparılan yeni araşdırmaya əsasən, qadınların əksəriyyəti ayaqlarının uzunluğuna uyğun hesab edilən ölçüdən fərqli ayaqqabı geyinir. 107 qadının iştirakı ilə keçirilən araşdırmada iştirakçıların 72 faizinin ABŞ ölçü sisteminə, 65 faizinin isə Avropa İttifaqında (EU) istifadə olunan ölçü sisteminə əsasən ayaq uzunluğundan hesablanan ölçüdən fərqli ayaqqabı geyindiyi müəyyənləşdirilib.

Tədqiqatın nəticələri International Journal of Fashion Design, Technology and Education jurnalında dərc olunub. Araşdırmada iştirakçıların daha böyük ölçülü ayaqqabılara üstünlük verməsi də diqqət çəkib. ABŞ ölçü sisteminə əsasən qadınların 59 faizi, Avropa ölçüsünə əsasən isə 52 faizi ayaq uzunluğunun göstərdiyi ölçüdən daha böyük ayaqqabı geyinib. Tədqiqatçılar hesab edirlər ki, daha böyük ayaqqabı ölçüsünə üstünlük verilməsi bəzi qadınların ayaqlarının eninə uyğun olmayan ayaqqabıları kompensasiya etmək cəhdi ola bilər. Yəni problem sadəcə yanlış ayaqqabı ölçüsünün seçilməsi ilə bağlı olmaya bilər.

Bu ehtimalı araşdırmanın digər nəticələri də dəstəkləyir.

Ayaq uzunluğuna əsasən eyni ayaqqabı ölçüsünə uyğun hesab edilən qadınların ayaqlarının ən geniş hissəsinin çevrəsi ABŞ ölçü sistemində 40 millimetrədək, Avropa ölçü sistemində isə 37 millimetrədək fərqlənib. Bu isə eyni uzunluğa malik ayaqların en və forma baxımından əhəmiyyətli dərəcədə fərqlənə bildiyini göstərir. Araşdırmada iştirak edən qadınların 68 faizinin ayaqqabıların uyğunluğu ilə bağlı ən azı bir təkrarlanan problem yaşadığı müəyyənləşdirilib. RMIT Universitetinin Moda və Tekstil Məktəbinin dosenti və tədqiqatın həmmüəllifi Saniyat Islam bildirib ki, nəticələr əsasən ayağın uzunluğuna əsaslanan ayaqqabı ölçüsü sistemlərinin məhdudiyyətlərini ortaya qoyur. Onun sözlərinə görə, problem qadınların ayaqqabı seçmək bacarığında deyil, mövcud ölçü sisteminin ayaqların formasını kifayət qədər dəqiq təsvir etməməsindədir. Islam qeyd edib ki, qadınlar çox vaxt düzgün uzunluqla düzgün en arasında seçim etməyə məcbur qalırlar. Çünki tək bir ayaqqabı ölçüsü ayağın bütün forma xüsusiyyətlərini əks etdirmir. Onun fikrincə, bəzi qadınların daha böyük ayaqqabı seçməsinin səbəbi məhz rahatlığı təmin etməyin ən asan yolunun bu olmasıdır.

Araşdırmaya görə, qadınların ayaq uzunluğu eyni olsa belə, ayaq eni baxımından kifayət qədər fərqlər mövcuddur. Bu müxtəlifliyi nəzərə almaq üçün təxminən altı və ya yeddi fərqli en variantına ehtiyac yarana bilər. Lakin hazırda ayaqqabıların əksəriyyəti yalnız bir en variantında satılır.

Tədqiqatçılar hesab edirlər ki, ayaqqabıların müxtəlif enlərdə təqdim edilməsi uyğunluğu yaxşılaşdırmaq baxımından yalnız uzunluğa əsaslanan ölçülərdən və yarım ölçülərin artırılmasından daha effektiv ola bilər. Islam bildirib ki, daha çox en seçiminin təqdim edilməsi istehlakçılara həm ayağın uzunluğuna, həm də eninə uyğun ayaqqabı tapmaq üçün daha böyük imkan verər.

Tədqiqat nəticələri ayaqqabı dizaynında Avstraliyanın çoxmillətli əhalisinin xüsusiyyətlərinin nəzərə alınmasının vacibliyinə də diqqət çəkir. Ayaqqabıların tez-tez çox dar olduğunu bildirən 25 iştirakçının 60 faizinin Şimal-Şərqi Asiya, Cənub-Şərqi Asiya və ya Cənubi Asiya mənşəli olduğu müəyyənləşdirilib.

Bununla belə, tədqiqat ayrı-ayrı etnik qruplar arasındakı fərqləri müəyyənləşdirmək məqsədi daşımayıb. Alimlər bu məsələni daha böyük iştirakçı qrupu ilə əlavə araşdırmaların aparılmasının vacib olduğunu bildiriblər. RMIT Universitetinin dosenti və tədqiqatın həmmüəllifi Carol Tan hesab edir ki, mövcud ayaqqabı ölçülərinin Avstraliyada yaşayan insanların ayaq formalarının müxtəlifliyini nə dərəcədə əks etdirdiyi daha ətraflı araşdırılmalıdır. Tan bildirib ki, Avstraliya dünyanın ən müxtəlif əhali tərkibinə malik ölkələrindən biri olsa da, ayaqqabı ölçüləri hələ də əsasən məhdud sayda Qərb ayaq formalarını nəzərə alır. Onun sözlərinə görə, insanların istifadəsi üçün məhsulların həqiqətən uyğun hazırlanması məqsəd qoyulursa, ayağın uzunluğunun onun xüsusiyyətlərinin yalnız bir hissəsini təşkil etdiyi nəzərə alınmalıdır.

Tədqiqatçılar istehlakçıların müxtəlif markalar və ABŞ, Böyük Britaniya və Avropa İttifaqının ölçü sistemləri arasında yaranan uyğunsuzluqları daha asan müəyyənləşdirə bilməsi üçün ayaqqabı ölçüləri barədə məlumatların daha aydın təqdim edilməsini də tövsiyə ediblər.

İştirakçıların yarıdan çoxu Böyük Britaniyanın ayaqqabı ölçüsü sistemində hansı ölçüyə uyğun gəldiyini bilməyib. Tədqiqatçılar bunun beynəlxalq ayaqqabı ölçülərini müqayisə edərkən istehlakçıların qarşılaşdığı qarışıqlığı bir daha nümayiş etdirdiyini bildirirlər.

Araşdırmanın nəticələri göstərir ki, ayaqqabı ölçüsünün yalnız ayağın uzunluğuna əsasən müəyyən edilməsi bütün qadınların ayaq quruluşunu düzgün əks etdirməyə bilər. Alimlər daha geniş ölçü və en seçimlərinin təqdim edilməsinin daha rahat və uyğun ayaqqabıların hazırlanmasına kömək edə biləcəyini hesab edirlər.

mənbə: medicalxpress.com