Rusiyalılar Azərbaycanı seçdi

Moskvada “National Geographic Traveler Avards 2018” mükafatının qalibləri açıqlanıb.

Axar.az xəbər verir ki, qaliblər 25 nominasiya üzrə 22 iyun-12 oktyabr tarixlərində keçirilən onlayn-səsvermə nəticəsində müəyyən edilib.

“Ekskursiyalı istirahət” nominasiyasında ölkəmiz rus turistlər arasında ən populyar ölkələrin ilk üçlüyünə daxil olub.

“Bu il nəhayət ki, biz Azərbaycana gedib çatdıq. Gəncliyimdə - 25 il bundan əvvəl Azərbaycanda olmuşam, ancaq o vaxtdan bu yana çox şey dəyişib. Məni təəccübləndirən ilk şey əlbəttə ki, Bakı şəhəri oldu. Şəhər inanılmaz şəkildə dəyişib, elə gözəl və qeyri-adi görünür ki, sadəcə valeh olursan. Palçıq vulkanlarını görməyi çoxdan istəyirdim. Axır ki, bu arzum gerçək oldu”, - “National Geographic Russia”nın şef-fotoqrafı Andrey Kamenev bildirib.

Səsvermənin nəticələrinə əsasən, Azərbaycan həmçinin rus turistlər üçün qastronomik turizm sahəsində ən populyar 3 istiqamətdən biri olub.