Sabahın döyüşçüsüz döyüşləri – Dronlar, pilotsuz təyyarələr və daha nələr...

Orta əsrlərdən dünyanın bölüşdürlüməsi prosesi sonralar ayrı-ayrı dövlətlərin ixtiyar sahibi olmaq iddiaları ilə daha da gücləndi və bugünkü dövlətlər yarandı. Bütün bunlar üçün  əvvəlcə qılınc-qalxan, ox-yaylar əldə edildi, bir az sonra top-tüfəng ortaya çıxdı, müharibələr daha da qızışdı və I, II Dünya Müharibələri anlayışı meydana gəldi. Bu müharibələri “ədalətli”, “ədalətsiz” kimi çeşidli kateqoriyalara böldülər, kiminə bəraət qazandırdılar, kiminə lənət oxudular. Amma bir fakt  faktlığında qaldı ki, bu böyük müharibələrdə  milyonlarla   insan məhv oldu və bu milyonların içində əsgərlər-döyüşçülər daha çox oldu.

Sonra bir az sakitlik yarandı və ara sakitliyi sanki böyük dövlətlərin yenidən  silahlanmasına  şərait yaratdı. Bu gün dünya yeni bir cahan müharibəsi  ərəfəsini yaşayır. İndi ABŞ-Rusiya qarşıdurması yeni dünya müharibəsi təhlükəsi yaradıb. Rusiya prezidenti Vladimir Putin ABŞ prezidenti Donald Trampın Rusiyaya qarşı silah tətbiqi hədəsinə qarşı belə cavab verdi: “Əgər Tramp silaha əl atarsa, bu, iki ölkənin deyil, bütün dünyanın bir anda məhvinə gətirib çıxaracaq”.

Əlbəttə, V.Putin səhnədə divardan asılmış (A.Çexov) atom silahının gücünü  və onun tətbiq edilməsi ehtimalını nəzərdə tutur.

Ən qəribəsi də budur ki, indiki müharibə uzaq mənzilli raketlərlə, tamamilə yeni texnologiya kimi ortaya çıxan dronlarla aparılacaq.  Burada uzaq məsafədən idarə olunan yeni texnoloji silahlara ordu qüvvəsi, əsgərlər, sıravi döyüşçülər deyil, texnologiyanın gücü özünü göstərəcək. İndi keçmişdə əlbəyaxa vuruşan döyüşçüləri yeni və yüksək texnologiyanı idarə edənlər əvəz edəcək. Arasında minlərlə kilometr məsafə olan iki ordu arasında texnologiya döyüşləri gedəcək.

ABŞ-ın bu yaxınlarda Hörmüz boğazına göndərdiyi pilotsuz təyyarəni İranın məhv etməsi prosesini əsgər deyil, texnoloqlar həyata keçirdi. İndi ABŞ bunun əvəzini ən yeni raketlərlə çıxa bilər...

Dünya təşvişə düşür. Rusiya, ABŞ və Çin kimi ölkələr ən yeni silahlarla ortaya çıxırlar. Lap bu günlərdə Türkiyə özünün mühərriksiz və sürücüsüz hərbi avtomobillərini nümayiş etdirdi. Haqqında çox söhbət gedən III Dünya Müharibəsi labüddürmü? Bu suala cavab vermək çətindir. Amma orası doğrudur ki, bu, insanların, əsgərlərin, döyüşçülərin həyata keçirdiyi müharibə olmayacaq. Bu, ən yeni texnologiyanın müharibəsi olacaq. O texnologiyanın ki, onun baş verdiyi  səhnələrdə döyüşçünün deyil, bütün dünyanın məhvi gözlənilir. Bu da inkişaf etmiş yeni texnologiyanın bəd tərəfi...