![Şabranda 8 yaşayış məntəqəsini birləşdirən yeni avtomobil yolu tikilir](https://ens.az/images/news/cc0072f355a6307b8228b7e694da6230.jpg)
Şabranda 8 yaşayış məntəqəsini birləşdirən yeni avtomobil yolu tikilir
Şabran rayonunda 8 yaşayış məntəqəsini birləşdirən yeni avtomobil yolunun tikintisinə başlanılıb.
AZƏRTAC-ın bölgə müxbiri xəbər verir ki, ümumi uzunluğu 23 kilometr olan Şabran-Düzbilici-Qorğan-Çinarlar avtomobil yolunun yenidən qurulması 3 min 500 nəfərə yaxın əhalinin rayon mərkəzinə gediş-gəlişini yaxşılaşdıracaq.
Tikintisinə yanvar ayından başlanılan yolda torpaq işlərinin 40 faizi görülüb. Hazırda ağır texnika vasitəsilə yolun üst qatı hamarlanaraq çınqıl tökülür və yol yatağı genişləndirilir.
Yola asfalt-beton örtüyünün salınmasına aprel ayında başlanılacaq. İki qatdan ibarət olacaq yeni asfalt örtüyünün eni 6 metr, qalınlığı isə 15 santimetr təşkil edəcək.
Tikinti zamanı Dəvəçi çayı üzərində 4 körpü və qrunt sularının axıdılması üçün suötürücü qurğular yerləşdiriləcək.
Şabran-Düzbilici-Qorğan-Çinarlar avtomobil yolunun tikintisinin 2019-cu ilin yay aylarında tamamlanması nəzərdə tutulur.
Bu yolun yenidən qurulması əhalinin gediş-gəlişini rahatlaşdırmaqla yanaşı, həm də onların tədarük etdikləri kənd təsərrüfatı məhsullarını və meyvə-tərəvəzi qısa vaxt ərzində istədikləri ünvanlara çatdırmağa imkan yaradacaq.
Şərhlər
Şərhləri göstər Şərhləri gizlət