Sağlamlıq imkanları məhdud uşaq və gənclərin cəlb edildiyi layihə uğurla yekunlaşıb

Prezident yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Gəncə Avro-Atlantik Məlumat Mərkəzi tərəfindən həyata keçirilən “Azərbaycanın qərb bölgəsində sağlamlıq imkanları məhdud olan uşaqların və gənclərin informasiya, təhsil və məşğulluq imkanlarının yaradılması ilə cəmiyyətə inteqrasiya imkanlarının gücləndirilməsi” layihəsi uğurla başa çatıb.

Gəncə Avro-Atlantik Məlumat Mərkəzinin İdarə heyətinin sədri Mehman Xəlilov AZƏRTAC-ın bölgə müxbirinə bildirib ki, sağlamlıq imkanları məhdud uşaqların və gənclərin cəmiyyətə inteqrasiya imkanlarının daha da gücləndirilməsi məqsədi daşıyan bu layihə çərçivəsində Gəncə şəhəri, Samux, Göygöl rayonlarında yaşayan, sağlamlıq imkanları məhdud olan uşaq və gənclər üçün “MS Office” kompüter proqramları üzrə təlim kursları təşkil edilib və ailə vəhdətinin gücləndirilməsi məqsədilə bu cür uşaqlara və onların valideynlərinə psixoloji dəstək göstərilib.

Eyni zamanda, xüsusi qayğıya ehtiyacı olan gənclərin əmək bazarına hazırlığının artırılması və özünəinam hissinin gücləndirilməsi, həmçinin bu gənclərin informasiya və təhsil imkanlarının genişləndirilməsi məqsədilə “Karyera hədəfinin seçilməsi”, “İş axtarma bacarıqları”, “CV-nin düzgün tərtibatı”, “Müsahibə qabiliyyəti”, “Təqdimatların hazırlanması”, “İdeyaların mübadiləsi”, “E-iştirakçılıq və “Online” təhsil” mövzularında seminarlar təşkil edilib.

Əlilliyi olan şəxslərə ictimai münasibətlərin daha düzgün formalaşdırılması məqsədilə, layihə çərçivəsində media və sosial media vasitəsilə 20-dən artıq maarifləndirmə və məlumatlandırma xarakterli materiallar yayımlanıb. Layihə nəticəsində daha uğurlu nəticələrə nail olunması və layihənin dayanıqlığının təmin edilməsi məqsədilə layihəyə əlavə dəyər gətirən fəaliyyətlər də həyata keçirilib. Bununla bağlı, layihədə iştirak etmək üçün təşkilata müraciət edən və sosial iş ixtisası üzrə ali təhsil alan 4 tələbə ilə könüllülük müqaviləsi bağlandıqdan sonra onlar layihə psixoloqunun köməkçisi üzrə könüllü vəzifəsində layihəyə cəlb ediliblər.

Layihədən birbaşa bəhrələnən xüsusi qayğıya ehtiyacı olan uşaqlardan və gənclərdən 3 nəfərinə yüksək parametrli kompüter avadanlıqları hədiyyə olunub. Bu kompüter avadanlıqlarının alınması layihə büdcəsində nəzərdə tutulmayıb.

Mehman Xəlilov deyib ki, bu layihə çərçivəsində xüsusi qayğıya ehtiyacı olan uşaqların və gənclərin təhsil, informasiya və məşğulluq imkanlarının artırılması, eyni zamanda, ailəyə psixoloji dəstək sahəsində həyata keçirilən fəaliyyətlər nəticəsində bu uşaqların və gənclərin intellektual və yaradıcı potensiallarının aşkara çıxarılması, özünəinam hissinin artırılması və nəticə etibarilə onların cəmiyyətə daha dolğun inteqrasiya olunmaları üçün imkanlar daha da genişləndirilib.