Şair Məmmədhüseyn - Güllü
Bər-bəzəkli çıxdın önə,
Sandım səni sona, Güllü.
Nədi, axı fikrin yenə,
Girmisən min dona, Güllü.
Gözlərini süzdürürsən,
Ürəyimi üzdürürsən.
Aşiqini öldürürsən,
Olma səbəb qana, Güllü.
Təkcəsisən bu dağların,
Bu bağçanın, bu bağların.
Bir dünyadır bu çağların,
Qıyam şirin, cana, Güllü.
Tər bənövşə dəstə-dəstə,
Düzmüsən, qız, sinən üstə.
Qulaqlarım qalıb səsdə,
Uça, bizə qona, Güllü.
Bu el-oba, Qoşqar, Kəpəz,
Həsrətinlə yanar, sönməz.
Məmmədhüseyn yoldan dönməz,
Çətin eşqin dana, Güllü.
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət